Gjyqi i punonjësve të kujdesit shëndetësor që trajtuan futbollistin e ndjerë argjentinas Diego Maradona pak para vdekjes së tij mund të anulohet pasi një gjyqtar kyç dha dorëheqjen të martën.
Julieta Makintach u tërhoq pasi u zbulua se ajo kishte marrë pjesë në një dokumentar rreth çështjes së profilit të lartë.
Çështja u shty javën e kaluar pas një sërë bastisjesh policore të cilat çuan në akuzimin e Makintach, 47 vjeç, të martën për shkelje të rregullave të paanshmërisë, për dhënie ndikimi dhe ryshfet për rolin e saj në miniserialin “Drejtësi Hyjnore”.
Pse po jep dorëheqjen gjyqtari?
Në gjykatë të martën, u shfaq një trailer për dokumentarin, i cili tha se do të ndiqte Makintach ndërsa ajo “rindërton vdekjen e Maradonës dhe disa momente të dhimbshme të jetës së tij që lidhen me braktisjen”.
Disa nga pamjet filmike dukeshin se përmbanin regjistrime që dyshohet se ishin bërë nga brenda sallës së gjyqit, gjë që do të përbënte shkelje të rregullave të gjykatës.
Gjatë shkëmbimeve të tensionuara, prokurori Patricio Ferrari akuzoi Makintach se “sjellej si aktore dhe jo si gjyqtare”.
Dy gjyqtarët e mbetur, Maximiliano Savarino dhe Veronica Di Tomasso, pritet të njoftojnë të enjten nëse gjyqi do të vazhdojë apo do të urdhërohet një gjyq i ri.
Për çfarë bëhet fjalë në gjyq?
Diego Maradona, i konsideruar si një nga lojtarët më të mirë në botë, i cili e udhëhoqi Argjentinën drejt lavdisë në Kupën e Botës në vitin 1986, vdiq në nëntor 2020 nga një atak kardiak në moshën 60 vjeç, ndërsa po shërohej në shtëpi nga një operacion në tru për një mpiksje gjaku.
Ai kishte kaluar vite duke luftuar varësinë nga kokaina dhe alkooli.
Shtatë anëtarë të ekipit të tij mjekësor janë në gjyq për vrasjen e dyshuar nga pakujdesia të legjendës së ndjerë të futbollit.
Të pandehurit, të cilët të gjithë i mohojnë akuzat, përballen me tetë deri në 25 vjet burg nëse shpallen fajtorë./DW
