Policia e Shtetit ka realizuar një operacion të suksesshëm për të shpërbërë një grup kriminal që mashtronte qytetarët përmes një platforme online të rreme investimesh. Gjashtë persona janë arrestuar, ndërsa katër të tjerë janë proceduar penalisht.
Operacioni, i quajtur “Recovery”, është zhvilluar nga Policia e Tiranës në bashkëpunim me autoritetet ndërkombëtare dhe ka çuar në zbulimin e një call center-i në Tiranë, ku kryheshin mashtrime kompjuterike. Gjatë aksionit, janë sekuestruar pajisje kompjuterike dhe celularë që përdorej për këto mashtrime.
Ata që u arrestuan janë: Indrit Kaziu, Lution Veseli, Elvis Hadaj, Maer Musabelliu, Dardan Rama dhe Aldo Pleshti. Gjithashtu, katër punonjës të tjerë, që ishin përfshirë në veprimtarinë e paligjshme, janë vendosur nën hetim.
Tre organizatorët e grupit janë identifikuar, dhe njëri prej tyre, A. Sh., është kapur dhe arrestuar, ndërsa dy të tjerë janë ende në kërkim.
Njoftimi:
Policia e Shtetit/Vijon në Shqipëri, operacioni policor ndërkombëtar i koduar “Platforma”, për goditjen e një grupi të strukturuar kriminal të përfshirë në mashtrime përmes një platforme të rreme investimesh online.
Drejtoria për Hetimin e Krimeve Kibernetike, në bashkëpunim me Sektorin për Hetimin e Krimeve Ekonomike dhe Financiare të DVP Tiranë dhe në drejtimin e Prokurorisë së Tiranës, finalizon në këtë kuadër, operacionin policor të koduar “Recovery”.
Zbulohet një call center në Tiranë, ku kryhej mashtrim kompjuterik. Vihet në pranga njëri nga 3 organizatorët e kësaj veprimtarie kriminale. Punohet për kapjen e 2 të tjerëve.
Gjithashtu, në pranga 6 punonjës në këtë subjekt, si dhe në hetim 4 të tjerë. Sekuestrohen pajisje kompjuterike dhe celularë që i shërbenin mashtrimit.
Në kuadër të operacionit “Recovery” dhe si rezultat i kontrolleve të kryera në vijim të operacionit ndërkombëtar “Platforma”, shërbimet e Policisë konstatuan se kati i parë i një pallati në rrugën “Janos Hunyadi”, ishte përshtatur si call center.
Nga ndërhyrja në këtë subjekt, u kapën në flagrancë dhe u vunë në pranga, punonjësit, shtetasit I. K., 33 vjeç, banues në Farkë, L. V., 22 vjeç, banues në Krujë, E. H., 38 vjeç, banues në Tiranë, M. M., 33 vjeç, banues në Tiranë, D. R., 34 vjeç, banues në Tiranë dhe A. P., 36 vjeç, banues në Tiranë.
Gjithashtu, u kapën në flagrancë, punonjësit, shtetasit A. P., 40 vjeçe, V. A., 38 vjeçe, K. A., 24 vjeçe dhe S. M., 38 vjeç, të gjithë banues në Tiranë, për të cilët nisi procedim në gjendje të lirë.
Si rezultat i hetimeve të kryera në kuadër të këtij operacioni, u identifikuan 3 organizatorët e mashtrimit kompjuterik, nëpërmjet këtij call centeri, shtetasit A. Sh., 36 vjeç, banues në Tiranë, A. R., 34 vjeç dhe A. G., 38 vjeç.
Shtetasi A. Sh. u kap nga Policia dhe u vu në pranga, në kuadër të operacionit “Recovery”. Ndërkaq, vijon puna për kapjen e 2 shtetasve të tjerë.
Materialet procedurale iu referuan Prokurorisë së Tiranës, për veprime të mëtëjshme.
