Një zyrtar i lartë i Hamasit ka deklaruar se grupi i armatosur nuk është i interesuar për bisedime të mëtejshme për një armëpushim të ri në Gaza apo për një marrëveshje për lirimin e pengjeve, për sa kohë që Izraeli vazhdon atë që ai e quajti “luftë urie”.
Izraeli ndërpreu ndihmat humanitare për Gazën nëntë javë më parë dhe më pas rifilloi ofensivën ushtarake, duke thënë se po përpiqej të ushtronte presion ndaj Hamasit për të liruar pengjet.
Por zyrtari i Hamasit, Bassem Naim, tha se “nuk ka asnjë kuptim për ndonjë negociatë” përderisa bllokada vazhdon, sipas BBC.
Këto deklarata vijnë pas miratimit nga kabineti i sigurisë i Izraelit të një ofensive të zgjeruar, e cila mund të përfshijë zhvendosjen e detyruar të shumicës së 2.1 milionë banorëve të Gazës dhe një okupim të pacaktuar të të gjithë territorit palestinez.
Sipas planit, Izraeli synon të zëvendësojë sistemin aktual të shpërndarjes së ndihmave me një rrjet të ri të kontrolluar nga kompani private dhe qendra ushtarake.
Zyra humanitare e OKB-së e ka kundërshtuar këtë ide, duke e quajtur një përpjekje për të “armatosur ndihmën”.
Zëdhënësi i ushtrisë izraelite tha të hënën se ofensiva e zgjeruar ka për qëllim kthimin në shtëpi të 59 pengjeve të mbetura, nga të cilët besohet se deri në 24 janë ende gjallë, si dhe “shkatërrimin dhe mposhtjen përfundimtare të regjimit të Hamasit”. Ai shtoi se operacioni do të përfshijë “zhvendosjen e shumicës së popullsisë së Rripit të Gazës për t’i mbrojtur ata në një zonë të lirë nga Hamasi”.
Një zyrtar izraelit u tha mediave se ofensiva nuk do të fillojë para vizitës së presidentit amerikan Donald Trump në rajon javën e ardhshme, duke ofruar atë që e quajti “një dritare mundësie” për Hamasin që të pranojë një marrëveshje të re për armëpushim dhe lirimin e pengjeve.
Megjithatë, deklaratat e Bassem Naim e kundërshtuan këtë ide: “Nuk ka asnjë kuptim në asnjë negociatë apo angazhim me propozime të reja ndërkohë që [Izraeli] vazhdon luftën e urisë kundër popullit tonë në Gazë – një luftë që komuniteti ndërkombëtar, përfshirë institucionet e OKB-së, e ka cilësuar si një krim lufte në vetvete”.
Hamas lëshoi gjithashtu një deklaratë ku i tha ministrave izraelitë se miratimi i ofensivës së re përfaqësonte “një vendim të qartë për të sakrifikuar” pengjet izraelite.
Sekretari i Përgjithshëm i OKB-së, António Guterres, paralajmëroi se një prani e gjatë ushtarake dhe operacione të zgjeruara tokësore do të çonin “në vdekjen e pashmangshme të shumë civilëve të tjerë dhe në shkatërrimin e mëtejshëm të Gazës”.
Ministri i Jashtëm francez, Jean-Noël Barrot, e quajti planin e Izraelit “të papranueshëm” dhe deklaroi se qeveria izraelite është “në shkelje të ligjit humanitar”.
Në Uashington, presidenti Trump tha se SHBA do të ndihmojë në furnizimin me ushqime për popullin e Gazës, pa dhënë shumë detaje. “Njerëzit po vdesin nga uria dhe ne do t’i ndihmojmë të marrin ushqim”, tha ai. “Hamasi po e bën të pamundur sepse ata po marrin gjithçka që futet.”
Izraeli ndërpreu të gjitha furnizimet më 2 mars dhe rifilloi ofensivën më 18 mars, pas dështimit të një armëpushimi dy mujor që çoi në lirimin e 33 pengjeve izraelite në këmbim të rreth 1.900 të burgosurve palestinezë.
Izraeli ka akuzuar Hamasin për vjedhje dhe magazinim të ndihmave – akuzë që Hamasi e ka mohuar. Por agjencitë humanitare kanë paralajmëruar se uria masive është e pashmangshme nëse nuk ndalet bllokada.
Zyra e OKB-së për Çështje Humanitare (OCHA) ka deklaruar se plani izraelit synon të “kontrollojë dhe kufizojë më tej furnizimet, që është e kundërta e asaj që nevojitet”.
Zëdhënësi Jens Laerke tha se OKB nuk do të bashkëpunojë me këtë plan, sepse ai nuk i përmbahet parimeve themelore humanitare të paanshmërisë, neutralitetit dhe shpërndarjes së pavarur të ndihmës.
“Paanshmëria do të thotë që ndihma jepet vetëm bazuar në nevojë, jo për të detyruar njerëzit të shkojnë diku. Pastaj neutraliteti dhe pavarësia: është jashtëzakonisht e rëndësishme që ata që marrin ndihmë të shohin një ofrues neutral nga i cili nuk kanë asgjë për të frikësuar,” tha ai.
OKB-ja ka theksuar se Izraeli është i detyruar nga e drejta ndërkombëtare të sigurojë ushqim dhe ndihmë mjekësore për popullsinë e Gazës. Izraeli ka këmbëngulur se po respekton ligjin ndërkombëtar dhe se nuk ka mungesë ndihmash, duke pretenduar se mijëra kamionë me ndihma hynë gjatë armëpushimit.
Ndërkohë, një banor palestinez i Gazës tha për BBC Arabic se propozimi i Izraelit ishte “kamuflazh” dhe se “nuk ka qëllim të lejojë ndihmat të hyjnë” në territor.
“Ky është parimi bazë mbi të cilin po punon Izraeli – të zgjatë bllokadën derisa Gaza të arrijë në një fazë të rëndë të urisë,” tha ai.
Një tjetër banor tha se shqetësimi i tij i vetëm ishte marrja e ndihmave për familjen: “Ajo që ka rëndësi për ne është të jetojmë, të hamë dhe të vazhdojmë jetën.”
Ushtria izraelite nisi fushatën për shkatërrimin e Hamasit pas sulmit të paprecedentë në 7 tetor 2023, ku u vranë rreth 1.200 persona dhe 251 të tjerë u morën peng.
Që atëherë, sipas ministrisë së shëndetësisë së drejtuar nga Hamasi në Gaza, janë vrarë të paktën 52.615 persona, përfshirë 2.507 që kur rifilloi ofensiva izraelite. Vetëm të martën, sipas autoriteteve shëndetësore, sulmet izraelite vranë të paktën 13 persona në Gaza.
