Presidenti amerikan Trump ka njoftuar se vendet që vijojnë të blejnë naftë ose produkte petrokimike iraniane do përballen me sanksione dytësore.
Masa vjen pasi Uashingtoni dhe Teherani janë duke u angazhuar në bisedime mbi programin bërthamor të Iranit. Republika Islamike thuhet se është e gatshme të mos militarizojë programin në këmbim të lehtësimit të sanksioneve.
Kushdo që zbulohet se bën tregti me naftë me Iranin “nuk do lejohet të bëjë biznes me Shtetet e Bashkuara të Amerikës në asnjë mënyrë a formë,” shkroi Trump në një postim në Truth Social të enjten, duke shtuar se “të gjitha blerjet e naftës iraniane ose prodhimeve petrokimike duhet të ndalojnë, tani.”
Njoftimi erdhi një ditë pasi Departamenti Amerikan i Shtetit vendosi sanksione kundër shtatë kompanive që tha se ishin të përfshira në tregtinë “e paligjshme” të naftës dhe prodhimeve petrokimike iraniane. Lista përfshin gjashtë subjekte me bazë në Emiratet e Bashkuara Arabe, si dhe një kompani turke dhe një kompani iraniane, shkruan Rt.
Në deklaratën e tij, Departamenti i Shtetit akuzoi Teheranin për nxitjen e konfliktit në Lindjen e Mesme, për çuarjen përpara të programit të tij bërthamor dhe mbështetjen e “partnerëve dhe prokurëve terroristë”. Departamenti Amerikan i Thesarit nuk komentoi zhvillimet e fundit dhe nuk njoftoi ndonjë kufizim të ri.
Uashingtoni i ka bërë presion Teheranit për një marrëveshje të re mbi programin e tij bërthamor. Në mars, Trump kërcënoi se do bombardonte Iranin “nëse ata nuk bëjnë një marrëveshje”. Teherani u përgjigj duke thënë se nuk do t’i nënshtrohej presionit. Të dy palët kanë mbajtur tre raunde bisedimesh për këtë çështje që u lehtësuan nga Omani.
Megjithatë, raundi i katërt u shty për “arsye logjistike dhe teknike”, njoftoi më herët të enjten ministri i Jashtëm iranian Abbas Araghchi. Ai shtoi se Teherani është megjithatë “më i vendosur se kurrë për të arritur një marrëveshje të drejtë dhe të ekulibruar”.
SHBA ka akuzuar gjithashtu Iranin për mbështetjen dhe drejtimin e luftëtarëve Houthi në Jemen. Trump nisi një fushatë masive sulmi kundër militantëve në mars me një qëllim të deklaruar për të mbrojtur anijet në Detin e Kuq.
