Policia e Vorës ka finalizuar operacionin e koduar “Street”, duke arrestuar në flagrancë një 20-vjeçar që lëvizte me armë zjarri në automjet.
Në pranga ka rënë shtetasi G.T., ndërsa pasagjeri O.X., gjithashtu 20 vjeç, u procedua penalisht për moskallëzim të krimit. Gjatë kontrollit të automjetit tip “Benz” në aksin rrugor “Fushë Krujë-Vorë”, policia gjeti një pistoletë nën sediljen e shoferit.
Njoftimi:
Tiranë/Finalizohet operacioni policor i koduar “Street”.
Lëvizte me armë zjarri në automjet, arrestohet në flagrancë 20-vjeçari.
Procedohet penalisht pasagjeri, për moskallëzim të krimit.
Sekuestrohet arma e zjarrit pistoletë.
Si rezultat i kontrolleve të kryera në bazë të informacioneve të siguruara nga inteligjenca policore, në vijim të punës intensive të Policisë, me objektiv goditjen e rasteve të mbajtjes pa leje të armëve të zjarrit, shërbimet e Komisariatit të Policisë Vorë finalizuan operacionin policor të koduar “Street”.
Në kuadër të operacionit u arrestua në flagrancë shtetasi G. T., 20 vjeç, si dhe u procedua në gjendje të lirë shtetasi O. X., 20 vjeç, të dy banues në Laç.
Në aksin rrugor “Fushë Krujë-Vorë”, i është bërë shenjë ndalimi automjetit tip “Benz” që drejtonte 20-vjeçari dhe ku ishte pasagjer shtetasi O. X.. Gjatë kontrollit në automjet, nën sediljen e 20-vjeçarit, është gjetur 1 armë zjarri pistoletë. Shtetasi O. X. dyshohet se kishte dijeni për amën dhe nuk ka kallëzuar.
Materialet procedurale iu referuan Prokurorisë së Tiranës, për veprime të mëtejshme.
