Një reporter sportiv në SHBA është shkarkuar nga puna, për shkak se iu referua në rrjetet sociale “xhaxhi Tom” një senatori republikan me ngjyrë.
Fred Gerteiny i “News 12” kishte shpërndarë një postim të “The Hill” ku thuhet se senatori me ngjyrë Tim Scott kishte deklaruar se presidenti Donald Trump kishte bërë gabim që nuk i kishte dënuar në mënyrë të qartë supremacistët e bardhë.
“Faleminderit Xhaxhi Tom”, shkroi Gerteiny në Twitter.
Punëdhënësi i gazetarit doli me një njoftim që po e pushonte atë nga puna, pas këtij komenti që e quante racist: “Pas shqyrtimit të incidentit, rrjeti ka shkarkuar nga puna reporterin sportiv, Fred Gerteiny, si rezultat i një komenti racist të pandjeshëm. News 12 Networks ka një politikë për zero tolerancë për racizmin ose sjelljen e pahijshme të bazuar në racë dhe krenohet me faktin se është një kompani e lajmeve objektive dhe të paanshme. “
Pas kësaj, Gerteiny e ka fshirë komentin e tij dhe ka kërkuar falje.
“Më herët sot, unë shkrova në Twitter një koment racist të pandjeshëm, kur i referova senatorit Tim Scott si ‘Xhaxhai Tom’. Unë i kërkoj falje Senatorit, kolegëve të mi në News12CT dhe kujtdo tjetër që mund të kem ofenduar me këtë postim shumë fyes.”- shkruan ai, citon Breitbart.
Pse të quash dikë “Xhaxhi Tom” konsiderohet fyese?
Xhaxhai Tom është një personazh kryesor i romanit të Harriet Beecher Stowe të vitit 1852, “Kabina e Xhaxhait Tom.”
Ky personazh shihet nga lexuesit si një portretizim humanist i një skllavi, një që përdor mosrezistencën dhe jep jetën e tij për të mbrojtur të tjerët që kanë shpëtuar nga skllavëria.
Por personazhi i tij shihet si tepër i nënshtruar në mënyrë të papërshtatshme për skllavopronarët e bardhë.
Ndaj “Xhaxhi Tom” filloi të përdorej si një epitet përçmues ndaj një personi me ngjyrë, tepër të nënshtruar dhe servil ndaj të bardhëve.
