Në Zacatecas, banorët u detyruan të strehohen mëngjesin e së premtes pas përplasjeve të armatosura që përfshinë edhe një sulm ndaj selisë së policisë bashkiake.
Nga njëra anë qëndron Karteli Jalisco New Generation (CJNG), dhe nga ana tjetër grupe rivale që synojnë të marrin kontrollin e kësaj zone strategjikisht shumë të rëndësishme, e cila shërben si një portë hyrëse drejt brendësisë së vendit.
Në këtë rajon, autokolona kriminelësh të armatosur nisën të qarkullonin që mbrëmjen e së enjtes dhe vijuan gjatë orëve të para të mëngjesit. Nëperiudha të ndryshme, të shtëna me armë u dëgjuan në disa pika të këtij territori, duke detyruar banorët të qëndronin brenda gjatë gjithë mëngjesit.
Disa automjete u gjetën të braktisura, të shpuara nga plumbat. Gjatë përplasjes, ndërtesa e selisë së policisë pësoi dëme të rënda. Dy makina patrulle të parkuara jashtë selisë u goditën rëndë nga të shtënat me armë të kalibrit të lartë.
Një person humbi jetën gjatë këtyre sulmeve. Qeveria e shtetit konfirmoi se është zbatuar një operacion i posaçëm sigurie; ajo gjithashtu pranoi se në këtë rajon, forcat e policisë bashkiake në të paktën pesë bashki kufitare me Jalisco janë aktualisht të pamjaftueshme dhe të cenueshme.
Si rrjedhojë, në ditët në vijim do të dislokohet një operacion i përbashkët special që përfshin Gardën Kombëtare, Ushtrinë dhe agjenci të ndryshme policore, shkruan Borderland Beat.
