Zonja e Parë e SHBA-së Melania Trump mbajti një deklaratë të shkurtër të enjten pasdite në Shtëpinë e Bardhë, duke reaguar ashpër ndaj atyre që e kanë lidhur me Jeffrey Epstein, duke i quajtur ata “pa standarde etike”.
Deklarata zgjati rreth tre minuta dhe nuk përfshiu pyetje nga media.
“Gënjeshtrat që më lidhin me të diskredituarin Jeffrey Epstein duhet të marrin fund sot,” tha ajo.
“Nuk kundërshtoj paditurinë e tyre, por refuzoj përpjekjet dashakeqe për të dëmtuar reputacionin tim.”
Një zyrtar i Shtëpisë së Bardhë i tha Fox News përpara aktivitetit se paraqitja do ishte një “deklaratë” dhe jo një njoftim formal.
Gjatë fjalës së saj, Trump sqaroi historinë e marrëdhënieve midis saj, bashkëshortit të saj, presidentit Donald Trump, dhe Epstein.
“Unë kurrë nuk kam qenë mike me Epstein. Donaldi dhe unë jemi ftuar herë pas here në të njëjtat festa si Epstein, pasi përzierja e rretheve shoqërore është e zakonshme në New York City dhe Palm Beach,” tha ajo.
Zonja e Parë i bëri thirrje Kongresit të ndërmarrë veprime lidhur me rrethin e Epstein, duke theksuar se “çdo grua” duhet të ketë mundësinë të dëshmojë.
“I bëj thirrje Kongresit që t’u japë grave që janë viktimizuar nga Epstein një seancë dëgjimore publike të përqendruar posaçërisht tek të mbijetuarat,” tha ajo. “Jepuni këtyre viktimave mundësinë të dëshmojnë nën betim përpara Kongresit, me fuqinë e dëshmisë së betuar. Çdo grua duhet të ketë ditën e saj për të treguar historinë në publik nëse dëshiron, dhe më pas dëshmia e saj duhet të regjistrohet përgjithmonë në procesverbalet e Kongresit.”
