Një media e lidhur me regjimin iranian ka publikuar një listë me nëntë kërkesa për përfundimin e luftës në Lindjen e Mesme, ndërsa situata në terren mbetet e tensionuar me sulme të vazhdueshme ushtarake.
Sipas raportimit të ynetnews, kushtet e propozuara përfshijnë tërheqjen e plotë të forcave amerikane nga rajoni dhe mbylljen e bazave të tyre në Azinë Perëndimore, si dhe ndalimin e sulmeve ndaj Iranit dhe aleatëve të tij.
Ndër kërkesat kryesore janë gjithashtu:
- heqja e të gjitha sanksioneve të SHBA-së dhe OKB-së ndaj Iranit
- lirimi i aseteve të ngrira iraniane
- njohja zyrtare e SHBA-së dhe Izraelit si agresorë dhe pagesa e kompensimeve për dëmet e luftës
- vendosja e kontrollit iranian mbi trafikun detar në Ngushticën e Hormuzit
- garanci që lufta nuk do të rifillojë
Po ashtu, raporti përmend edhe mundësinë që Irani të tërhiqet nga Traktati për Mospërhapjen e Armëve Bërthamore, në varësi të interesave kombëtare.
Këto kërkesa janë cilësuar nga zyrtarët amerikanë si “të çuditshme dhe jorealiste”, duke e bërë të vështirë arritjen e një marrëveshjeje paqeje.
Ndërkohë, në terren, ushtria izraelite (IDF) njoftoi se ka ndërmarrë një valë të re sulmesh në Teheran, duke goditur qendra të përkohshme komanduese, objekte të prodhimit të armëve, baza raketash balistike, sisteme të mbrojtjes ajrore dhe pika vëzhgimi.
Sulmet synojnë dobësimin e kapaciteteve ushtarake të Iranit, ndërsa raportimet tregojnë se autoritetet iraniane kanë tentuar të zhvendosin strukturat komanduese në njësi të lëvizshme për t’iu shmangur goditjeve.
Konflikti mbetet i hapur, me përpjekje të ndërmjetësuara për dialog, por hendeku mes kërkesave të palëve vijon të jetë i madh.
