Autoritetet iraniane kanë urdhëruar mbylljen e një zinxhiri kafenesh në Tehran pasi gotat e kafesë “takeaway” me një dizajn të konsideruar “të dyshimtë” u interpretuan nga zyrtarët si një aludim për një atentat të mundshëm izraelit ndaj Liderit Suprem Ali Khamenei.
Sipas raportimeve të medias iraniane të cituara nga AFP, degët e zinxhirit Lamiz në Teheran u mbyllën dhe u vulosën me urdhër të gjyqësorit. Vendimi erdhi pasi u shpërndanë gota me një ilustrim të një karrigeje bosh, të cilën autoritetet e interpretuan si një referencë ndaj vdekjes së mundshme të Khameneit në fillim të luftës me Izraelin dhe Shtetet e Bashkuara, si dhe ndaj mungesës nga jeta publike të djalit të tij dhe pasardhësit të supozuar, Mojtaba Khamenei.
“Lokali ka përdorur imazhe të dyshimta kundër imamit të martirizuar në produktet e tij gjatë ditëve të fundit,” deklaruan zyrtarët pas mbylljes së bizneseve.
Dizajni që shkaktoi polemikën është një vepër e vitit 1975 e artistit iranian Farshid Mesghali, që paraqet një karrige shumëngjyrëshe të rrethuar nga pika boje.
Zinxhiri Lamiz deklaroi se gotat me ilustrime ishin projektuar përpara luftës, në prag të Nowruz, Vitit të Ri persian që festohet këtë muaj. Në deklarata të publikuara në rrjetet sociale (të cilat më pas u mbyllën), kompania mohoi çdo qëllim politik.
“Gotat nuk kanë asnjë lidhje me ngjarjet e fundit. Prodhimi i tyre — nga miratimi i dizajnit përfundimtar deri te printimi — është kryer gjatë disa muajve dhe shpërndarja në magazina ishte përfunduar para se të nisnin këto zhvillime,” thuhej në deklaratë.
Lamiz operon më shumë se 20 degë në Teheran, si dhe disa të tjera jashtë kryeqytetit. Sipas raportimeve, vetëm lokacionet në Teheran janë mbyllur.
Kultura e kafeneve është zgjeruar vitet e fundit në Teheran dhe qytete të tjera të mëdha iraniane, ku këto ambiente shërbejnë si hapësira sociale dhe kulturore. Disa prej tyre janë vënë më parë nën vëzhgim nga autoritetet gjatë periudhave të protestave kundër qeverisë, shkruan Ynet.
