Gjatë një takimi me Departamentin e Çështjeve Sociale të Partisë Demokratike, kreu i saj Sali Berisha formuloi akuza të forta ndaj qeverisë dhe ndaj ish-zëvendëskryeministres Belinda Balluku, të cilën e përmendi me epitetin “Lubi Balluku”.
Në deklaratën e tij, Berisha pretendoi se gjatë periudhës kur Balluku ka pasur në administrim sektorë të rëndësishëm, janë menaxhuar rreth 12 miliardë euro fonde publike, por sipas tij vetëm një pjesë e vogël e tyre është reflektuar në investime konkrete. Ai deklaroi se nga kjo shumë, rreth 1 miliard euro është përdorur për projekte reale, ndërsa pjesa tjetër, sipas pretendimit të tij, nuk është pasqyruar në rezultate të dukshme.
Berisha shprehu shqetësimin se, sipas tij, Shqipëria mund të përbëjë një rast të pazakontë për shkallën e lartë të dyshuar të keqpërdorimit të investimeve publike, duke akuzuar zyrtarë të lartë për përvetësim fondesh në përmasa të mëdha.
Ndër çështjet që ai veçoi ishte projekti i inceneratorit të Tiranës, të cilin e cilësoi si rast problematik në menaxhimin e financave publike. Sipas Berishës, rreth 130 milionë euro janë shpenzuar pa u reflektuar në progres konkret të projektit në terren.
Ai drejtoi akuza edhe ndaj kryeministrit Edi Rama, duke pretenduar se përzgjedhja e kompanive përfituese dhe përdorimi i fondeve publike është bërë në mënyrë të parregullt, ndërsa ngriti dyshime për transferime financiare në llogari offshore.
Sipas tij, problematika e abuzimit me fondet publike nuk lidhet vetëm me një projekt të vetëm, por shtrihet, siç pretendoi ai, në shumë iniciativa të tjera publike me vlera të konsiderueshme. Berisha shtoi se, paralelisht me këto zhvillime, qytetarët përballen me vështirësi ekonomike gjithnjë e më të mëdha.
Në vijim, ai u ndal edhe te situata sociale, duke theksuar se pensionistët, sipas tij, hasin vështirësi në përballimin e kostove për barna dhe shërbime shëndetësore. Ai pretendoi se një pjesë e konsiderueshme e qytetarëve mbulojnë nga të ardhurat e tyre një pjesë të madhe të shpenzimeve për kujdes shëndetësor, në nivele që i cilësoi më të larta se në vende të tjera europiane.
Në përfundim, Berisha akuzoi qeverinë se përdor skema mbështetjeje financiare për qëllime elektorale, ndërsa pretendoi se pasuritë e disa zyrtarëve publikë janë rritur ndjeshëm gjatë kësaj periudhe.
Deklarata e Berishës
“Shqipëria mund të jetë vendi i vetëm në botë, nuk mund të them me siguri se është, në të cilin investimet publike zhduken nga 90 në 100 përqind të tyre dhe këto janë të dokumentuara. Pra, plaçkiten nga zyrtarët më të lartë të vendit. Asgjë nuk mund të mbulojë, nuk mund të mbyllë gropën më të zezë të ekziston në historinë e këtij vendi, në kryeqytetin e vendit, djegësin e Tiranës. 130 milionë euro të zhdukura pa nam dhe nishan. Të zhdukura nga një kompani e përzgjedhur nga Edi Rama, e cila vetëkuptohet ka marrë vetëm shpërblimin e emrit, se 130 milionë euro i morën ata që i nxorën nga thesari i shtetit dhe i dërguan në bankat offshore.
Për 5 vite, në këtë vepër publike, pavarësisht se nga thesari i vendit disbursoheshin dhjetëra milionë në vit, nuk u hodh një tullë dhe në krye të 6 viteve nuk ka një themel. Dhe prokuroria nuk ka arritur të gjejë, të rikuperojë as dhe një qindarkë. Nuk është si shumë në vlerë më i madhi djegësi i Tiranës, por është më i dukshmi, më i qarti. Shuma kolosale, qindra e qindra milionë janë vjedhur në vepra të tjera publike, miliarda.
Vetëm Lubi Balluku ka disponuar gjatë periudhës së saj si ministre dhe zëvendëskryeministre, 12 miliardë euro. 12 miliardë euro, në mënyrë absolute, në çdo lloj kontrolli, nuk shkojnë kurrë më shumë se 1 miliard investime në publike, të cilat janë shembur njëra pas tjetrës. Janë zhdukur. Ndërkohë, shqiptarët varfëroheshin dhe varfërohen çdo vit e më shumë. Shqiptarët sot 760 mijë pensionistë, përveçse një grup i vogël, nuk mund të përballojnë në mënyrë absolute mjekimin me ilaçet e përditshme. Nuk i marrin dot. Me ilaçet, me çmime stratosferike.
60 përqind, shqiptarët janë qytetarët që paguajnë më shumë në Evropë nga xhepi i tyre për shëndetin e tyre. Kudo paguajnë njerëzit, qytetarët për shëndetin e tyre, por paguajnë një përqindje të caktuar.
Dhe kjo përqindje në Shqipëri iu është rritur dhe është sot më e larta, çka do të thotë se kanë si alternativë pamundësinë e mjekimit, pamundësinë e blerjes së ilaçeve. Për pensionistët është gjetur një formulë mashtrimi elektoral. 50 euro vota e tyre në zgjedhjet lokale, 100 euro vota e tyre në zgjedhjet e përgjithshme. Ndërkohë, kontot bankare të qeveritarëve shkojnë qindra milionë dhe miliarda.”
