Partia Socialdemokrate e kryeministres daneze Mette Frederiksen është në rrugë për rezultatin e saj më të dobët zgjedhor që nga viti 1903, ndërsa votimi parlamentar në vendin skandinav mbetet shumë i ngushtë për t’u shpallur një fitues i qartë, sipas sondazheve pas votimit (exit poll).
Blloku i majtë i Frederiksen pritet të sigurojë mes 83 dhe 86 vende në parlamentin danez, përpara një grupimi të djathtë që mund të fitojë mes 75 dhe 78 vende, sipas dy sondazheve.
Partia centriste e ish-kryeministrit të djathtë Lars Løkke Rasmussen duket në një pozicion të favorshëm për të mbajtur balancën e pushtetit, me 14 vende.
Gjithsej 90 vende janë të nevojshme për shumicën në parlamentin danez, ndërsa disa qeveri të mëparshme janë mbështetur në votat e deputetëve që përfaqësojnë territoret gjysmë-autonome të Groenlandës dhe Ishujve Faroe.
Deklaratat e përsëritura të presidentit amerikan Donald Trump për marrjen nën kontroll të Groenlandës nga Kopenhaga, potencialisht edhe me forcë, e vendosën Danimarkën në qendër të vëmendjes gjeopolitike para zgjedhjeve dhe i dhanë një shtysë Frederiksen pas një rezultati zhgënjyes në zgjedhjet lokale në nëntor.
Rasmussen, i cili u fotografua duke pirë duhan jashtë Shtëpisë së Bardhë pas një takimi me zëvendëspresidentin amerikan JD Vance dhe sekretarin e shtetit Marco Rubio në janar, duket se ka fituar rolin e “vendimmarrësit kyç” në çdo diskutim për koalicion mes 12 partive që pritet të hyjnë në parlament.
Frederiksen vlerësohet nga disa se ka dobësuar të djathtën ekstreme në Danimarkë duke adoptuar politika të ashpra kundër emigracionit, por sondazhet e fundit treguan një ringjallje të mbështetjes për parti të tilla. Tre parti kundër emigracionit pritet të sigurojnë rreth 17 për qind të votave.
Partia Socialdemokrate mori mes 19 dhe 21 për qind të votave në sondazhet pas votimit, dukshëm më pak se 24.8 për qind që kishte arritur në vitin 2011, i cili ishte rezultati më i dobët i saj gjatë shekullit të kaluar. Një nga forcat politike më dominuese në Europën Perëndimore, partia kishte marrë 20.4 për qind të votave në vitin 1903.
“Është një rezultat katastrofik për Socialdemokratët. Mette Frederiksen mund të ketë një profil shumë të lartë në skenën europiane, por në Danimarkë ajo ndodhet në një krizë të thellë,” tha Noa Teddington, komentatore politike dhe ish-këshilltare komunikimi për Socialdemokratët.
Ndërkohë, partia kryesore e djathtë pritet të shënojë rezultatin më të dobët në historinë e saj, me Partinë Liberale të udhëhequr nga ministri i Mbrojtjes Troels Lund Poulsen që parashikohet të marrë rreth 9 për qind të votave.
Partia Liberale pritet të tejkalohet nga Liberal Alliance, një grup libertarian që shkaktoi polemika pasi lideri i saj pranoi gjatë fushatës se kishte përdorur kokainë.
Fituesit më të mëdhenj duket se janë E Majta e Gjelbër dhe Partia Popullore Daneze kundër emigracionit, të cilat shënuan rritje të mbështetjes sipas sondazheve. E Majta e Gjelbër vlerësohet se ka marrë mes 11 dhe 12 për qind të votave, ndërsa Partia Popullore Daneze mes 7 dhe 8 për qind.
Analistët presin një periudhë të gjatë negociatash politike për të siguruar një koalicion funksional, por shumë besojnë se Frederiksen ka ende avantazhin për të fituar një mandat të tretë radhazi, pasi e djathta mbetet më e fragmentuar dhe nuk ka një kandidat të fortë për postin e kryeministrit.
