Marina franceze ka ndaluar dhe inspektuar një tanker në Detin Mesdhe të premten, i cili sipas Presidentit Emmanuel Macron lidhet me flotën ruse të sanksionuar që transporton naftë në shkelje të sanksioneve ndërkombëtare për luftën në Ukrainë.
Autoritetet detare franceze për Mesdheun thanë se tanker-i Deyna dyshohet të operojë nën një flamur të rremë. Operacioni u zhvillua në bashkëpunim me aleatët, përfshirë Mbretërinë e Bashkuar, e cila monitoroi anijen, sipas Euronews.
Autoritetet deklaruan se qëllimi i operacionit ishte “verifikimi i kombësisë së anijes”, e cila po lundronte me flamurin e Mozambikut dhe vinte nga porti rus i Murmanskut. Dokumentet e gjetura në bord konfirmuan dyshimet mbi vlefshmërinë e flamurit.
Tanker-i u devijua dhe u shoqërua nga marina franceze në një pikë ankorimi për kontroll më të hollësishëm, dhe çështja iu referua prokurorit të portit të Marsejës.
Në një postim në X, Macron e quajti Deyna një anije të “flotës së errët”:
“Këto anije, që shmangin sanksionet ndërkombëtare dhe shkelin ligjin e detit, janë përfitues të luftës. Ato synojnë të gjenerojnë fitime dhe të financojnë përpjekjet e Rusisë në luftë. Nuk do ta lejojmë këtë,” tha ai.
Rusia besohet të përdorë një flotë prej qindra anijesh për të shmangur sanksionet lidhur me luftën e saj kundër Ukrainës. Franca dhe vende të tjera kanë premtuar se do të godasin këtë praktikë.
Më herët këtë janar, marina franceze kishte ndaluar një tjetër tanker nafte në Mesdhe që vinte nga Rusia; anija u lirua muajin e kaluar pas pagesës së një gjobe prej disa milionë eurosh.
Në shtator të vitit të kaluar, forcat franceze të marinës inspektuan një tjetër tanker nafte në bregdetin Atlantik të Francës, që Macron e lidhi gjithashtu me flotën e errët ruse. Presidenti rus Vladimir Putin e quajti atë ndalim si një akt piraterie.
