667028490
Administrata e presidentit Trump do t’u kërkojë qytetarëve nga 50 vende të depozitojnë garanci prej 15,000 dollarësh për të aplikuar për hyrje në SHBA, tha të mërkurën një zyrtar i Departamentit të Shtetit.
Zyrtari, duke folur në kushte anonimiteti, tha se 12 shtete po i shtohen një liste që përfshinte tashmë 38 kombe të tjera, kryesisht në Afrikë.
Programi i zgjeruar i garancisë për viza, i cili kërkon që këta shtetas të huaj të paguajnë 15,000 dollarë për një vizë B1 ose B2 për biznes dhe turizëm, hyn në fuqi më 2 prill. Qëllimi është të parandalohen vizitorët që të qëndrojnë përtej afatit të vizave të tyre, tha zyrtari.
Shtetet e reja që përfshira në programin e garancisë së vizave janë Kamboxhia, Etiopia, Gjeorgjia, Grenada, Lesoto, Mauritius, Mongolia, Mozambiku, Nikaragua, Papua Guinea e Re, Sejshellet dhe Tunizia.
Zyrtari tha se garancitë do t’u kthehen përfituesve të vizave të cilët kthehen në shtëpi në përputhje me kushtet e vizës dhe të garancisë, ose nuk udhëtojnë fare.
Që nga marrja e detyrës janarin e kaluar, Trump, një republikan, ka ndjekur një politikë të rreptë emigracioni, duke përfshirë një fushatë agresive dëbimi, anulime të vizave dhe green card, si dhe kontrolle të postimeve në rrjetet sociale dhe fjalimeve të kaluara të imigrantëve.
Grupet e të drejtave të njeriut kanë dënuar politikat e Trumpit për emigracionin dhe udhëtimin, duke thënë se ato kufizojnë garancitë e procesit të rregullt ligjor dhe lirinë e fjalës. Trump dhe aleatët e tij thonë se politikat synojnë të përmirësojnë sigurinë e brendshme.
Qershorin e kaluar, ai lëshoi një ndalim udhëtimi që bllokoi plotësisht ose pjesërisht qytetarët e 19 kombeve nga hyrja në SHBA për arsye të sigurisë kombëtare.
Zyrtari i Departamentit të Shtetit tha se programi i garancisë së vizave ka reduktuar numrin e njerëzve që qëndrojnë përtej afatit të vizave të tyre.
38 shtetet e përfshira më parë janë Algjeria, Angola, Antigua dhe Barbuda, Bangladeshi, Benini, Butani, Botsvana, Burundi, Kepi i Gjelbër, Republika e Afrikës Qendrore, Bregu i Fildishtë, Kuba, Xhibuti, Republika Domenikane, Fixhi, Gaboni, Gambia, Guinea, Guinea-Bisau, Kirgistani, Malavi, Mauritania, Namibia, Nepali, Nigeria, Sao Tome dhe Principe, Senegali, Taxhikistani, Tanzania, Togo, Tonga, Turkmenistani, Tuvalu, Uganda, Vanuatu, Venezuela, Zambia dhe Zimbabve.
