Irani dhe Izraeli kanë vazhduar shkëmbimin e sulmeve ndërsa lufta në Lindjen e Mesme ka hyrë në javën e dytë. Ndërkohë, presidenti iranian Masoud Pezeshkian kërkoi falje ndaj vendeve fqinje që janë prekur nga veprimet e Iranit, duke u bërë thirrje atyre të mos i bashkohen sulmeve amerikano-izraelite kundër Teheranit, përcjell Reuters.
“Unë personalisht u kërkoj falje vendeve fqinje që janë prekur nga veprimet e Iranit,” deklaroi Pezeshkian, duke shtuar se Irani do të pezullojë përkohësisht sulmet ndaj shteteve të rajonit nëse nga territori i tyre nuk kryhen goditje kundër Iranit.
Ai hodhi poshtë gjithashtu kërkesën e presidentit amerikan Donald Trump për dorëzim pa kushte të Republikës Islamike, duke e cilësuar atë si “një ëndërr”. Megjithatë, Trump e interpretoi deklaratën e presidentit iranian si shenjë dorëzimi dhe paralajmëroi se Irani mund të goditet “shumë fort”.
Pas deklaratave të Pezeshkianit, Garda Revolucionare iraniane njoftoi se dronët e saj goditën një qendër ajrore luftarake amerikane në bazën Al Dhafra pranë Abu Dhabit, në Emiratet e Bashkuara Arabe, megjithëse raporti nuk është konfirmuar në mënyrë të pavarur.
Autoritetet në Dubai raportuan se një person humbi jetën pasi mbetje nga një ndërhyrje ajrore ranë mbi një automjet. Ndërkohë, fluturimet drejt dhe nga Dubai u pezulluan përkohësisht për shkak të incidenteve me mbetje raketash.
Media shtetërore iraniane raportoi gjithashtu se forcat iraniane kanë goditur edhe një bazë amerikane në Bahrein, ndërsa shpërthime janë dëgjuar edhe në Doha të Katarit.
Konflikti është përhapur përtej kufijve të Iranit. Teherani ka goditur Izraelin dhe disa shtete të Gjirit që strehojnë baza ushtarake amerikane, ndërsa Izraeli ka kryer sulme të reja në Liban pas raketave të lëshuara nga Hezbollah.
Shtetet e Gjirit kanë shprehur zemërim pasi infrastruktura civile, përfshirë hotele, porte dhe objekte energjetike, është goditur edhe pse ato nuk kanë marrë pjesë drejtpërdrejt në sulmet ndaj Iranit.
Presidenti i Emirateve të Bashkuara Arabe, Sheikh Mohammed bin Zayed Al Nahyan, deklaroi se vendi i tij “nuk është një pre e lehtë”, gjatë një vizite tek të plagosurit nga sulmet.
Ndërkohë, Izraeli paralajmëroi Libanin se do të paguajë një “çmim shumë të rëndë” nëse nuk frenon Hezbollahun. Forcat izraelite kanë intensifikuar bombardimet ajrore ndaj zonave ku vepron grupi në periferitë jugore të Bejrutit.
Sipas Ministrisë së Shëndetësisë së Libanit, numri i viktimave nga sulmet izraelite që prej fillimit të javës ka arritur në 294. Nga ana tjetër, sipas ambasadorit iranian në OKB, Amir Saeid Iravani, sulmet amerikano-izraelite kanë vrarë të paktën 1,332 civilë iranianë dhe kanë plagosur mijëra të tjerë.
Sulmet iraniane kanë shkaktuar gjithashtu 10 viktima në Izrael dhe kanë vrarë të paktën gjashtë ushtarë amerikanë.
Përshkallëzimi i konfliktit ka rritur ndjeshëm çmimet e energjisë dhe ka tronditur tregjet globale. Ngushtica e Hormuzit është praktikisht e mbyllur për lundrim, ndërsa disa vende të rajonit kanë nisur të ulin prodhimin e naftës dhe gazit.
Presidenti amerikan Donald Trump deklaroi se marina amerikane mund të shoqërojë anijet tregtare në Gjirin Persik, por Garda Revolucionare iraniane sfidoi këtë ide duke thënë se Irani “pret” çdo prani amerikane në ngushticë.
Ndërkohë, në Iran ka nisur diskutimi për zgjedhjen e një lideri të ri suprem, ndërsa klerikët konservatorë kanë kërkuar që procesi të përshpejtohet.
