Një grua ka humbur jetën dhe të paktën 20 persona të tjerë janë plagosur pas një goditjeje direkte me raketë në Tel Aviv, gjatë një breshërie sulmesh të lëshuara nga Irani, njoftuan shërbimet e emergjencës izraelite.
Sipas Magen David Adom, shërbimi kombëtar i emergjencës në Izrael, një burrë rreth të 40-ave është plagosur rëndë nga copëza predhash.
Gruaja, e cila fillimisht u raportua në gjendje kritike, ndërroi jetë disa orë pas sulmit si pasojë e plagëve të marra, përcjell Ynet.
Më herët, ekipet mjekësore raportuan për një person në gjendje të moderuar dhe disa të tjerë me lëndime të lehta.
Në një përditësim të mëparshëm, dy persona ishin përshkruar si të plagosur në gjendje të moderuar. Të gjithë të lënduarit janë transportuar në spitalet pranë zonës.
Goditja shkaktoi gjithashtu zjarre në vendngjarje. Automjete u përfshinë nga flakët, ndërsa çatia e një ndërtese banimi u pa duke u djegur pas impaktit.
Forcat e shpëtimit dhe zjarrfikësit punuan për të shuar flakët dhe për të kontrolluar ndërtesat e dëmtuara, mes frikës se persona të tjerë mund të jenë bllokuar nën rrënoja.
Sulmi vjen në kuadër të përshkallëzimit të konfliktit mes Izraelit dhe Iranit, ndërsa tensionet në rajon mbeten në nivele të larta.
