Afganistani dhe Pakistani kanë shkëmbyer sulme ndërkufitare, duke shënuar një tjetër përshkallëzim të tensioneve mes dy vendeve fqinje.
Autoritetet në Pakistan deklaruan se forcat e tyre të armatosura po kundërpërgjigjen ndaj një sulmi të ndërmarrë herët të enjten nga talibanët afganë. Ministria pakistaneze e informacionit njoftoi se “forcat e regjimit taliban po ndëshkohen” në zonat Chitral, Khyber, Mohmand, Kurram dhe Bajaur, duke e cilësuar ofensivën e mëparshme nga pala afgane si “të paprovokuar”.
“Pakistani do të marrë të gjitha masat e domosdoshme për të mbrojtur integritetin territorial dhe sigurinë e qytetarëve të tij,” theksoi ministria.
Islamabadi pretendon se ushtria pakistaneze ka vrarë 36 luftëtarë të talibanëve afganë dhe ka plagosur shumë të tjerë, ndërsa ka shkatërruar disa poste dhe pajisje ushtarake afgane. Nga ana e Afganistan-it nuk pati një reagim të menjëhershëm ndaj këtyre pretendimeve.
Më herët gjatë së enjtes, forcat afgane nisën një ofensivë kundër pozicioneve pakistaneze, duke e paraqitur atë si hakmarrje për sulmet ajrore të kryera nga Pakistani gjatë fundjavës mbi kampe militantësh në territorin afgan, ku sipas raportimeve humbën jetën të paktën 18 persona.
Zëvendëszëdhënësi i qeverisë talibane, Hamdullah Fitrat, deklaroi se forcat afgane kishin vrarë 40 ushtarë pakistanezë në provincën verilindore Kunar dhe kishin marrë nën kontroll 15 poste kufitare pakistaneze. Ai shtoi se trupat afgane janë vendosur përgjatë Linja Durand, kufiri i diskutueshëm prej rreth 2,575 kilometrash mes dy shteteve.
CNN thekson se nuk ka mundur të verifikojë në mënyrë të pavarur këto pretendime.
Ministri pakistanez i informacionit, Attaullah Tarar, njoftoi se dy ushtarë pakistanezë u vranë dhe tre të tjerë u plagosën. Ai hodhi poshtë pretendimet e Kabulit, duke akuzuar qeverinë afgane për “përhapje propagande të rreme dhe të pabazuar”. Në një postim në X, Tarar shkroi se, pas humbjeve në terren, regjimi taliban po mbështetet në “gënjeshtra dhe propagandë”.
Sipas ministrisë pakistaneze të informacionit, sulmet ajrore të fundjavës kishin në shënjestër kampet e Tehrik-e-Taliban Pakistan (TTP), të njohur si talibanët pakistanezë, si dhe degët e tyre dhe një grup të lidhur me Shteti Islamik. Islamabadi i fajëson këto organizata për një seri sulmesh të përgjakshme brenda territorit të Pakistanit, shkruan CNN.
Autoritetet pakistaneze deklarojnë se kanë “prova bindëse” se këto sulme janë kryer nga militantë që veprojnë me “urdhër të udhëheqjes dhe instruktorëve të tyre me bazë në Afganistan”.
