Tetë persona, përfshirë autorin e dyshuar, humbën jetën pas një sulmi me armë zjarri në një shkollë të mesme në provincën kanadeze të British Columbia, njoftuan autoritetet të martën. Dy persona të tjerë u gjetën të pajetë në një banesë pranë shkollës, në një incident që besohet të jetë i lidhur me ngjarjen kryesore, përcjell DW.
Sipas Policisë Mbretërore të Kanadasë (RCMP), forcat e rendit hynë në ambientet e shkollës menjëherë pas njoftimit për të shtëna aktive.
“Gjatë kontrollit, oficerët gjetën disa viktima. Një individ që besohet të jetë autorja e sulmit u gjet gjithashtu e pajetë me atë që duket si plagë e vetëshkaktuar”, thuhet në deklaratën e RCMP-së.
Mediat kanadeze raportojnë se autorja e dyshuar është një grua, një rast i pazakontë pasi sulmet masive me armë në Amerikën e Veriut kryhen pothuajse gjithmonë nga burra. Policia nuk ka dhënë detaje mbi identitetin e autores apo llojin e armëve të përdorura.
Gjashtë persona, pa përfshirë autoren e dyshuar, u gjetën të vdekur në ambientet e shkollës. Një viktimë e shtatë ndërroi jetë gjatë transportimit për në spital.
Më shumë se 25 persona mbetën të plagosur në sulmin në Tumbler Ridge Secondary School, ndërsa dy prej tyre ndodhen në gjendje të rëndë ose kritike dhe janë transportuar me helikopter drejt spitalit.
Policia bëri të ditur se të gjithë nxënësit dhe stafi janë evakuuar në mënyrë të sigurt dhe se nuk ka të dyshuar të tjerë apo rrezik të vazhdueshëm për publikun.
Autoritetet morën njoftimin për të shtënat rreth orës 13:20 me orën lokale (20:20 GMT) të martën, më 10 shkurt. Kryeministri i British Columbia, David Eby, deklaroi se policia arriti në shkollë brenda dy minutash nga marrja e njoftimit.
Kryeministri i Kanadasë, Mark Carney, shprehu mbështetje për familjet e prekura, duke u shprehur se ishte “i shkatërruar nga të shtënat e tmerrshme në Tumbler Ridge”.
Zyra e tij njoftoi se ai ka pezulluar një vizitë të planifikuar në Halifax dhe një udhëtim në Mynih të Gjermanisë, ku do të merrte pjesë në Konferencën e Sigurisë së Mynihut.
Kryetari i bashkisë së Tumbler Ridge, Darryl Krakowka, tha se komuniteti është në zi, duke e përshkruar qytetin si “një familje të madhe”.
Tumbler Ridge është një komunë e vogël dhe e izoluar me rreth 2,400 banorë, e vendosur në ultësirat e Maleve Shkëmbore, më shumë se 1,000 kilometra në veri të Vancouver-it, pranë kufirit me Albertën.
Sipas transmetuesit publik kanadez CBC, sulmi në Tumbler Ridge është i dyti më vdekjeprurës në historinë e shkollave në Kanada. Ngjarje të tilla mbeten të rralla në vend
