Rrjeti i tuneleve nëntokësore të Elon Musk në Las Vegas, i njohur si “Vegas Loop”, është vënë sërish nën shqyrtim këtë javë nga ligjvënësit e Nevadës, të cilët kanë ngritur shqetësime për shkelje të dyshuara të rregullave të sigurisë në punë dhe të mbrojtjes së mjedisit.
Ligjvënësit zhvilluan për disa orë seanca dëgjimore, gjatë të cilave pyetën zyrtarë shtetërorë të sigurisë mbi akuzat ndaj kompanisë Boring Company, në pronësi të Musk, e cila ka projekte tunelesh edhe në Nashville dhe Dubai. Përfaqësuesit e kompanisë refuzuan të merrnin pjesë personalisht, por dërguan përgjigje me shkrim ku mbrojtën projektin.
“Mendoj se është një kompani që sillet sikur është mbi ligjin dhe dëshiron të luajë sipas rregullave të veta,” deklaroi për Associated Press deputeti demokrat Howard Watts, zona elektorale e të cilit përfshin projektin e tuneleve.
E hapur për herë të parë në vitin 2021, “Vegas Loop” ofron udhëtime falas brenda Qendrës së Konventave të Las Vegasit dhe tarifa nga 4 deri në 12 dollarë për destinacione të tjera si hotele, kazino dhe aeroporti.
Udhëtimet realizohen me automjete Tesla, të cilat mund të thirren përmes faqes online ose nga stacionet. Boring Company ka miratim për të ndërtuar 68 milje tunele dhe 104 stacione në vitet e ardhshme, në një qytet që vuan mungesën e një transporti publik të shpejtë dhe efikas.
Kryetarja e bashkisë së Las Vegasit, Shelley Berkley, e vlerësoi projektin në janar, pasi qyteti lëshoi një leje për ndërtimin e një tuneli të ri.
“Qyteti është i entuziazmuar të sjellë një alternativë inovative transporti në qendër të Las Vegasit dhe të krijojë një mënyrë tjetër që vizitorët të përjetojnë gjithçka që qyteti ka për të ofruar,” u shpreh ajo.
Megjithatë, ndaj kompanisë janë ngritur akuza të shumta për shkelje të rregullave të sigurisë dhe mjedisit. Midis viteve 2020 dhe 2026, janë paraqitur 17 ankesa pranë Administratës Shtetërore të Sigurisë dhe Shëndetit në Punë në Nevada.
Vitin e kaluar, ProPublica raportoi se kompania ishte akuzuar për gati 800 shkelje mjedisore në projektin e saj në Las Vegas.
Nga këto 17 ankesa, njëra çoi në një inspektim me tetë citime të propozuara, përfshirë pretendime se 15 deri në 20 punonjës u plagosën nga djegie me përshpejtues kimikë dhe se nuk kishte dushe për punonjësit që u spërkatën me këto substanca.
Disa ankesa të tjera mbeten ende të hapura. Boring Company ka paguar afro 600 mijë dollarë gjoba, shumica e të cilave shkuan për distriktin lokal të trajtimit të ujërave, për shkarkime të ujërave të patrajtuara. Kompania po kundërshton rreth 355 mijë dollarë gjoba pranë OSHA-s së Nevadës dhe Departamentit të Mbrojtjes së Mjedisit.
Kompania nuk iu përgjigj kërkesave për koment nga Associated Press, por në një letër drejtuar ligjvënësve theksoi procedurat e saj të sigurisë, përfshirë inspektime ditore dhe trajnime për sigurinë në punë.
Watts solli gjithashtu në vëmendje një incident të shtatorit 2025, kur një punëtor pësoi një dëmtim të rëndë shtypës brenda një tuneli, pasi u bllokua mes dy tubave 4 mijë këmbë të gjatë. Sipas tij, zjarrfikësit përdorën një vinç për ta nxjerrë punëtorin nga hyrja e tunelit.
Në një deklaratë të asaj kohe për mediat lokale, kompania tha se po hetonte incidentin dhe se siguria dhe mirëqenia e punonjësve janë prioritet kryesor, duke shtuar se punonjësi ishte në gjendje të qëndrueshme.
Watts tha se ligjvënësit mund të propozojnë legjislacion vitin e ardhshëm për të përshpejtuar vlerësimin e shkeljeve dhe për të shkurtuar afatet për kundërshtimin e tyre.
Ky shqyrtim në Nevada vjen në një kohë kur kompania e Musk ka nisur ndërtimin e një projekti të ngjashëm në Nashville, pavarësisht kundërshtimeve nga disa zyrtarë lokalë, të cilët shprehin shqetësime për sigurinë, transparencën dhe mungesën e përfshirjes së komunitetit. Segmenti fillestar prej 13 miljesh synon të lidhë aeroportin e qytetit me qendrën.
Nga ana tjetër, vitin e kaluar shteti tërhoqi mbi 425 mijë dollarë gjoba që lidhnin me një incident të majit 2025, ku dy zjarrfikës pësuan djegie kimike gjatë një stërvitjeje në kantier.
Sipas këshilltares ligjore të OSHA-s, Salli Ortiz, raportet kishin gabime dhe mospërputhje që e bënin të vështirë justifikimin e gjobave.
Inspektimet treguan se zjarrfikësit kishin zgjedhur të mos vishnin një shtresë të dytë mbrojtëse dhe se kompania kishte zhvilluar gjashtë takime sigurie me departamentin e zjarrfikësve para stërvitjes.
Ligjvënësit demokratë kritikuan guvernatorin republikan Joe Lombardo dhe administratën e tij për, sipas tyre, qasje të butë ndaj kompanisë. Drejtori i Departamentit të Biznesit dhe Industrisë së Nevadës, Kris Sanchez, mohoi se kishte presion politik në vendimmarrje.
Ndërkohë, sistemi i tuneleve mbetet mjaft popullor mes vizitorëve, veçanërisht gjatë eventeve të mëdha si Panairi i Elektronikës CES. Shumë përdorues e vlerësojnë si të shpejtë dhe të përshtatshëm, megjithëse disa shprehin frikë për sigurinë dhe pasiguri ndaj një kompanie të drejtuar nga Musk.
“Është një ide e mirë, por më tremb,” tha një vizitore, duke reflektuar dilemat që shoqërojnë një nga projektet më të debatueshme të transportit urban në SHBA.
a
