Kryeministri Edi Rama ka reaguar sërish ashpër ndaj kërkesës së shoqatës së gjyqtarëve për rritjen e pagave, duke e cilësuar atë si të papranueshme dhe të paprecedentë në historinë europiane. Në një komunikim për mediat, kreu i qeverisë tha se është i habitur nga reagimi i gjyqtarëve dhe nga, sipas tij, tentativa për t’i imponuar Kuvendit dhe qeverisë vendime përmes pushtetit gjyqësor.
Rama deklaroi se kërkesa përfshin rreth 37 milionë euro nga buxheti i shtetit dhe parashikon rritje të ndjeshme të pagave për gjyqtarët, duke përmendur se paga e një gjyqtari Apeli synohet të rritet nga rreth 3,480 euro në mbi 5,000 euro, ndërsa për gjyqtarët e Gjykatës së Lartë dhe strukturave të tjera rritja do të ishte edhe më e lartë. Ai theksoi se SPAK nuk i është bashkuar kësaj kërkese.
Sipas kryeministrit, pagat aktuale të gjyqtarëve janë tashmë në nivele të krahasueshme me ato të vendeve të rajonit dhe të Greqisë, duke shtuar se rritje të tilla nuk justifikohen nga ligji apo Kushtetuta. Rama akuzoi shoqatën e gjyqtarëve për populizëm dhe për përpjekje që, sipas tij, cenojnë ndarjen e pushteteve.
Ai rikujtoi se në vitin 2016, në kuadër të reformës në drejtësi, qeveria kishte miratuar rritje të konsiderueshme pagash për gjyqtarët, me synimin për të garantuar pavarësinë e tyre dhe forcimin e sistemit të drejtësisë. Sipas Ramës, këto vendime u morën në një kontekst tjetër ekonomik dhe politik, ndërsa sot kërkesat e reja nuk janë të arsyetuara.
Kryeministri theksoi se qëndrimi i tij nuk synon të nxisë debat publik, por të sqarojë, sipas tij, të vërtetën mbi këtë çështje dhe të mbrojë interesin publik dhe buxhetin e shtetit.
