Administrata e Presidentit të SHBA-së, Donald Trump, do të reduktojë me 700 numrin e agjentëve federalë të zbatimit të ligjit të emigracionit në shtetin e Minesotës, megjithatë rreth 2 mijë agjentë do të mbeten ende në terren, njoftoi të mërkurën koordinatori i Shtëpisë së Bardhë për çështjet e kufirit, Tom Homan.
Trump ka dislokuar këtë vit mijëra agjentë të armatosur të emigracionit në dhe përreth qytetit të Mineapolisit, me qëllim ndalimin dhe dëbimin e emigrantëve, një veprim që ka shkaktuar protesta të gjera.
Homan tha se vendimi për tërheqjen e pjesshme të forcave është marrë pasi, sipas tij, po vërehet një bashkëpunim “i paprecedentë” nga ana e sherifëve të zgjedhur në Minesotë, të cilët administrojnë burgjet e qarqeve, përcjell Reuters.
“Ta bëjmë të qartë: Presidenti Trump ka për qëllim të plotë të realizojë dëbime masive gjatë kësaj administrate dhe veprimet e zbatimit të ligjit të emigracionit do të vazhdojnë çdo ditë në të gjithë vendin. Presidenti Trump bëri një premtim. Dhe ne nuk kemi vepruar ndryshe nga ky drejtim,” deklaroi Homan në një konferencë për shtyp.
Trump, një republikan, dhe zyrtarët e lartë të administratës së tij kanë deklaruar vazhdimisht se shumë emigrantë duhet të dëbohen, duke i fajësuar ata, shpesh në terma të përgjithësuar, për mashtrime financiare dhe krime të dhunshme.
Minesota, e cila qeveriset nga demokratët, ka paditur administratën Trump për shkak të rritjes së pranisë së agjentëve federalë. Ky intensifikim ka nxitur javë të tëra protestash, të cilat kanë çuar në vrasjen e dy shtetasve amerikanë nga agjentë federalë.
Homan kërkon që më shumë burgje në Minesotë të lejojnë agjentët e emigracionit të marrin në dorëzim emigrantët e ndaluar. Disa institucione tashmë bashkëpunojnë, ndërsa të tjera, përfshirë burgun kryesor të Mineapolisit, nuk e bëjnë këtë.
Qyteti i Mineapolisit dhe disa qytete të tjera ndalojnë punonjësit e tyre, përfshirë policinë, që të pyesin individët për shtetësinë ose të bashkëpunojnë me autoritetet federale të emigracionit.
Autoritetet lokale argumentojnë se një politikë e tillë kërcënon sigurinë publike, pasi emigrantët që janë viktima ose dëshmitarë të krimeve mund të kenë frikë të raportojnë rastet te autoritetet.
