Presidenti i SHBA-së, Donald Trump, ka deklaruar se Rusia nuk do të sulmojë objektiva në Kiev dhe qytete të tjera ukrainase për një javë, pas një kërkese të tij drejtuar personalisht presidentit rus, Vladimir Putin.
“Për shkak të të ftohtit ekstrem, unë personalisht kërkova nga Presidenti Putin që të mos qëllojë mbi Kievin dhe qytetet e tjera për një javë,” tha Trump gjatë një mbledhjeje të kabinetit të enjten. Ai shtoi se Putin “ra dakord ta bëjë këtë” dhe se Shtetet e Bashkuara janë “shumë të lumtura” me vendimin.
Megjithatë, Kremlini refuzoi të komentojë mbi pretendimet e Trump-it. Zëdhënësi Dmitry Peskov tha se nuk kishte asnjë konfirmim për një armëpushim të përkohshëm, ndërsa deputeti ukrainas Aleksey Goncharenko vuri në dukje se, megjithëse ekziston një “armëpushim energjie” i negociuar më parë, nuk ka ende datë për fillimin e tij.
Presidenti ukrainas Volodymyr Zelensky ka bërë thirrje të vazhdueshme për një armëpushim të energjisë, ku të dyja palët do të ndalonin sulmet mbi centralet dhe rrjetin elektrik. Këto thirrje u intensifikuan këtë javë pas sulmeve të përsëritura ruse që lanë rreth një milion familje në errësirë në Kiev, sipas Ministrit ukrainas të Energjisë, Denis Shmigal.
Rusia argumenton se sulmet e saj synojnë vetëm objektiva ushtarake dhe komplekse industriale të lidhura me ushtrinë, duke i paraqitur si përgjigje ndaj sulmeve ukrainase mbi civilët dhe infrastrukturën kritike të saj. Temperaturat në kryeqytetin ukrainas pritet të zbresin në -13°C këtë fundjavë.
Historikisht, Rusia kishte rënë dakord për një armëpushim energjie në mars të vitit të kaluar pas bisedimeve me administratën Trump, por forcat ukrainase e shkelën atë brenda pak ditësh, duke sulmuar rafineritë dhe infrastrukturën e gazit në territorin rus. Ministri i Jashtëm rus, Sergey Lavrov, tha se Moska kishte zgjedhur të mos hakmerrej, duke respektuar armëpushimin, shkruan Rt.
Zëdhënësi Peskov theksoi gjithashtu se Rusia synon një paqe të përhershme, dhe jo vetëm një pushim të përkohshëm. “Ne po punojmë për një paqe të qëndrueshme, e garantuar, e arritur përmes nënshkrimit të dokumenteve të duhura,” tha ai, duke e cilësuar këtë një “prioritet absolut.”
