Izraeli ka gjetur mbetjet e pengut të fundit që mbahej në Gazë, njoftoi ushtria të hënën, duke përmbushur kështu një kusht kyç të fazës fillestare të planit të Presidentit të SHBA-së, Donald Trump, për t’i dhënë fund luftës në territorin palestinez.
Mbetjet e oficerit të policisë Ran Gvili — i cili mbahej në Gazë për më shumë se 840 ditë — janë identifikuar dhe do të kthehen për t’u varrosur, bëri të ditur ushtria përmes një deklarate.
Zbulimi i trupit mund të hapë rrugën për një rihapje të kufizuar të pikës kufitare të Rafahut mes Gazës dhe Egjiptit, porta kryesore e enklavës së shkatërruar drejt botës së jashtme, në përputhje me premtimet izraelite. Komiteti palestinez i teknokratëve, i mbështetur nga SHBA për administrimin e Gazës, ka deklaruar se pika kufitare pritet të hapet këtë javë.
Pengu i ndjerë cilësohet si hero
Mbetjet e Gvilit ndodheshin në Gazë që prej momentit kur ai u vra gjatë sulmit të Hamasit më 7 tetor 2023, sulm që nxiti ofensivën izraelite dyvjeçare.
Pamjet e transmetuara nga mediat izraelite treguan dhjetëra ushtarë të rreshtuar krah për krah në vendin ku u gjet trupi, duke kënduar këngë hebraike. Në rrjetet sociale, nëna e tij, Talik, e përshkroi djalin e saj si hero. Gvili ishte jashtë shërbimit më 7 tetor, duke u rikuperuar nga një dëmtim, kur u vra teksa luftonte kundër militantëve.
Kryeministri izraelit Benjamin Netanyahu e cilësoi zbulimin si një “arritje të jashtëzakonshme për Shtetin e Izraelit”. “Rani është një hero i Izraelit, i cili hyri i pari dhe doli i fundit”, deklaroi ai.
Faza tjetër e marrëveshjes
Gvili ishte një nga 251 pengjet e rrëmbyer gjatë sulmit të vitit 2023. Në momentin kur Izraeli dhe Hamasi ranë dakord për armëpushimin në tetor, 48 pengje mbeteshin ende në Gazë, 28 prej të cilëve besohej se kishin vdekur, përfshirë edhe Gvilin.
Dorëzimi i të gjithë pengjeve, të gjallë dhe të vdekur, ishte një angazhim thelbësor i fazës së parë, ndërsa pjesë të tjera të marrëveshjes vazhdojnë të mbeten të paplotësuara dhe ekzistojnë ndarje të thella mbi hapat e mëtejshëm.
Administrata Trump njoftoi se plani i udhëhequr nga SHBA do të kalojë në fazën pasuese, e cila synon rindërtimin e Gazës dhe çmilitarizimin e territorit. Zëdhënësi i Hamasit, Hazem Qassem, deklaroi se zbulimi i mbetjeve të Gvilit konfirmon përkushtimin e Hamasit ndaj planit, duke shtuar se informacioni i dhënë prej tyre ndihmoi në gjetjen e trupit.
Kushtet për hapjen e kufirit
Kufiri i Gazës me Egjiptin duhej të hapej që në fazën fillestare, por autoritetet izraelite kishin kundërshtuar vazhdimisht, duke argumentuar se Hamasi duhej fillimisht të kthente trupin e pengut të fundit.
Reuters raportoi të premten se Izraeli synon të kufizojë numrin e palestinezëve që hyjnë në Gazë përmes kufirit dhe të kontrollojë të gjithë personat që përdorin pikën e kalimit në një pikë kontrolli ushtarak izraelit aty pranë.
Sipas të dhënave izraelite, sulmi i Hamasit në tetor 2023 vrau 1,200 persona, ndërsa autoritetet shëndetësore të Gazës raportojnë se ofensiva izraelite ka shkaktuar vdekjen e rreth 71,000 palestinezëve, shkruan Reuters.
