Presidenti amerikan Trump ka pohuar se bashkë me Sekretarin e NATO-s Rutte është formësuar një kornizë mbi një marrëveshje të ardhshme për të ardhmen e Groenlandës.
Sipas shefit të Shtëpisë së Bardhë, korniza përfshin gjithashtu gjithë rajonin e Arktikut dhe shton se nëse ajo përmbyllet me sukses, do jetë e shkëlqyer për SHBA-në dhe NATO-n. Trump shkruan se i ka shtyrë tarifat e paralajmëruara ndaj disa vendeve të BE-së.
“Bazuar në një takim shumë produktiv që kam pasur me Sekretarin e Përgjithshëm të NATO-s, Mark Rutte, ne kemi formuar kornizën e një marrëveshjeje të ardhshme në lidhje me Grenlandën dhe, në fakt, me të gjithë Rajonin e Arktikut. Kjo zgjidhje, nëse përfundohet, do të jetë e shkëlqyer për Shtetet e Bashkuara të Amerikës dhe të gjitha vendet e NATO-s.
Bazuar në këtë mirëkuptim, unë nuk do vendos tarifat që ishin planifikuar të hynin në fuqi më 1 shkurt. Diskutime shtesë po mbahen në lidhje me “Kupolën e Artë” sa i përket Groenlandës. Informacione të mëtejshme do bëhen të disponueshme me përparimin e diskutimeve. Zëvendëspresidenti JD Vance, Sekretari i Shtetit Marco Rubio, i Dërguari i Posaçëm Steve Witkoff dhe persona të tjerë të ndryshëm, sipas nevojës, do të jenë përgjegjës për negociatat. Ata do më raportojnë drejtpërdrejt mua. Ju faleminderit për vëmendjen tuaj ndaj kësaj çështjeje!” – shkruan Trump në Truth Social.
