Franca synon që Grupi i Shtatë vendeve më të industrializuara (G7) të forcojë bashkëpunimin me vendet e BRICS, në përpjekje për të kundërshtuar fragmentimin në rritje të rendit global. Këtë mesazh Presidenti francez Emmanuel Macron e përcolli të martën gjatë Forumit Ekonomik Botëror në Davos.
Parisi mori në janar presidencën e radhës të G7, dhe sipas Macronit, një nga prioritetet kryesore do të jetë rivitalizimi i bashkëpunimit brenda grupit, duke zgjeruar njëkohësisht dialogun me ekonomitë në zhvillim. “Qëllimi ynë është të ndërtojmë ura dhe bashkëpunim me vendet në zhvillim, BRICS dhe G20,” deklaroi ai.
I krijuar në vitin 2006, BRICS përfaqëson një organizatë ndërqeveritare që përfshin dhjetë shtete — Brazilin, Kinën, Egjiptin, Etiopinë, Indinë, Indonezinë, Iranin, Rusinë, Afrikën e Jugut dhe Emiratet e Bashkuara Arabe — të cilat së bashku përbëjnë më shumë se një të katërtën e ekonomisë globale dhe afro gjysmën e popullsisë botërore.
“Fragmentimi i botës nuk ka kuptim,” theksoi Macron, duke shtuar se është koha që “fuqitë e mëdha” të dëshmojnë se janë ende të afta të bien dakord për vlerësime të përbashkëta mbi ekonominë globale dhe të angazhohen në veprime konkrete.
Një qëndrim të ngjashëm presidenti francez kishte shprehur edhe në fillim të muajit, gjatë fjalimit të tij vjetor para ambasadorëve francezë, përpara vizitës së planifikuar në Indi, e cila këtë vit do të mbajë presidencën e BRICS. “G7 nuk duhet të jetë një klub anti-Kinë apo anti-BRICS,” kishte deklaruar ai.
Megjithatë, në Davos, Macron nuk kurseu kritikat ndaj Pekinit, duke e akuzuar për mungesë hapjeje të tregut në të njëjtin nivel me Bashkimin Evropian dhe për mbushjen e tregjeve evropiane me mallra, në vend të investimeve dhe transferimit të teknologjisë. Ai i bëri gjithashtu thirrje BE-së të forcojë instrumentet e saj të mbrojtjes tregtare, në një kontekst të tensioneve tregtare në rritje dhe të mbikapaciteteve industriale nga Azia, shkruan Rt.
