Figura e opozitës iraniane Reza Pahlavi u bëri thirrje të premten aktorëve ndërkombëtarë që të shtojnë presionin ndaj autoriteteve në Teheran, duke argumentuar se kjo do t’u jepte mundësi protestuesve të rrëzonin sundimin klerikal, edhe pse demonstratat janë dobësuar ndjeshëm pas një shtypjeje të ashpër dhe me viktima.
Pahlavi, djali i shahut të përmbysur të Iranit që jeton në mërgim, deklaroi në një konferencë për shtyp se pjesë të konsiderueshme të ushtrisë dhe forcave të sigurisë i kanë shprehur në mënyrë joformale mbështetjen e tyre dhe se ai e sheh veten si një figurë të aftë për të garantuar një tranzicion të qëndrueshëm për vendin, duke theksuar se synon të kthehet në Iran pa përcaktuar një afat konkret.
Ai pranoi se është e vështirë të matet realisht niveli i mbështetjes për të brenda vendit për shkak të kufizimeve të rënda mbi mediat dhe internetin, ndërkohë që presidenti amerikan Donald Trump ka shprehur së fundmi dyshime mbi aftësinë e Pahlavit për të mobilizuar mbështetje të gjerë në Iran, pavarësisht kërcënimeve të tij të vazhdueshme për ndërhyrje në mbështetje të protestuesve.
Sipas raportimeve të Axios, Pahlavi është takuar fundjavën e kaluar me të dërguarin e Shtëpisë së Bardhë Steve Witkoff, por ai refuzoi të japë detaje mbi kontaktet me zyrtarët amerikanë, duke e cilësuar momentin si të ndjeshëm dhe duke shprehur besimin se Trump do të qëndrojë përfundimisht në krah të popullit iranian, duke shtuar se ndihma ndërkombëtare nuk është kurrë e vonuar dhe se përpjekjet do të vazhdojnë deri në fitore.
Gjatë konferencës u shfaqën pamje që tregonin protestues të plagosur dhe skena nga demonstratat, përfshirë thirrje pro-shahiste, të cilat janë dëgjuar krahas sloganeve të tjera që kërkojnë fundin e Republikës Islamike pa iu referuar monarkisë.
Pahlavi theksoi se iranianët po veprojnë drejtpërdrejt në terren dhe se tani është momenti që bashkësia ndërkombëtare t’i mbështesë plotësisht, duke kërkuar sanksionimin e udhëheqjes dhe strukturave komanduese të Gardës Revolucionare, ngrirjen e aseteve të elitës klerikale, dëbimin e diplomatëve iranianë dhe ndihmë për thyerjen e bllokadës së komunikimit përmes sistemeve satelitore të internetit si Starlink, shkruan Reuters.
Ai deklaroi se është krijuar një kanal i sigurt komunikimi për persona që duan të dezertojnë nga qeveria ose forcat e sigurisë dhe se dhjetëra mijëra kanë kontaktuar, pa sqaruar se si do të ushtrohej kontroll real mbi aparatin e gjerë të sigurisë, përfshirë Gardën Revolucionare.
Pahlavi nënvizoi se suksesi i protestuesve nuk kërkon dërgimin e trupave të huaja, pasi populli iranian është tashmë në rrugë dhe po sakrifikon çdo ditë për lirinë e tij, ndërsa shtoi se një Iran demokratik nën drejtimin e tij do të kishte marrëdhënie të mira me fqinjët, përfshirë Izraelin, të cilin ai e ka vizituar në vitin 2023 duke u takuar me kryeministrin Benjamin Netanyahu.
Reza Pahlavi, 65 vjeç dhe banues në SHBA, ka jetuar jashtë Iranit që përpara Revolucionit Islamik të vitit 1979, ndërkohë që opozita iraniane mbetet e fragmentuar mes fraksioneve të ndryshme ideologjike dhe duket se ka një prani të kufizuar të organizuar brenda vetë Republikës Islamike.
