Disa familje në fshatin Cernalevë, që jetojnë poshtë rrugës për në fshatin Borje, po përballen me rrezik serioz nga shkarjet masive të dherave dhe trupit të rrugës, si pasojë e prurjeve të shumta të ujit të shkaktuara nga reshjet e shiut dhe dëborës.
Situata paraqitet tejet problematike, pasi një sasi e madhe dheu po i afrohet tre banesave, duke rrezikuar drejtpërdrejt pronat dhe jetën e banorëve. Familjet e prekura kanë kërkuar ndërhyrje të menjëhershme nga institucionet përgjegjëse për të parandaluar përkeqësimin e mëtejshëm të situatës.
Ndërkohë, sa i përket gjendjes së përgjithshme në qarkun e Kukësit, raportohet një përmirësim i dukshëm. Bashkitë Kukës, Has dhe Tropojë po vijojnë punën për riparimin e dëmeve të shkaktuara në tre ura dhe katër akse rrugore, në njësitë administrative Zapod, Shishtavec, Topojan dhe Bushtricë.
