Grupe të armatosura separatiste kurde kanë tentuar ditët e fundit të kalojnë kufirin nga Iraku për të hyrë në territorin iranian, në një zhvillim që sugjeron përpjekje të aktorëve të jashtëm për të shfrytëzuar paqëndrueshmërinë e krijuar pas shtypjes së vazhdueshme të protestave kundër autoriteteve në Teheran.
Tre burime të njohura me çështjen, përfshirë një zyrtar të lartë iranian, folën në kushte anonimiteti dhe thanë se shërbimi sekret i Turqisë kishte paralajmëruar Gardën Revolucionare Islamike të Iranit për lëvizjet e luftëtarëve kurdë përgjatë kufirit.
Sipas zyrtarit iranian, njësitë e Gardës Revolucionare janë përfshirë në përleshje me këto grupe të armatosura, të cilat, sipas tij, synonin të nxisnin destabilizim dhe të përfitonin nga situata e krijuar nga protestat masive. Garda Revolucionare konsiderohet një forcë elitare dhe ka qenë në vijën e parë të përballjes me trazira të mëparshme në vend.
Nga ana e saj, agjencia turke e inteligjencës, MIT, nuk ka dhënë ende një reagim zyrtar lidhur me këto pretendime, ashtu si edhe presidenca turke në Ankara. Turqia, e cila i cilëson militantët kurdë në veri të Irakut si organizata terroriste, ka paralajmëruar së fundmi se çdo ndërhyrje e huaj në Iran do të rrezikonte të përshkallëzonte më tej krizat në rajon.
Zyrtari iranian tha se luftëtarët ishin dërguar drejt kufirit iranian nga territori i Irakut dhe Turqisë, duke shtuar se autoritetet në Teheran u kanë kërkuar zyrtarisht këtyre vendeve të ndalojnë çdo lëvizje të luftëtarëve apo furnizim me armë drejt Iranit.
Ndërkohë, një organizatë për të drejtat e njeriut raportoi se rreth 2,600 persona janë vrarë ditët e fundit gjatë shtypjes së protestave në Iran, ku demonstruesit kundërshtojnë sundimin klerikal. Këto protesta janë mbështetur publikisht nga Shtetet e Bashkuara, të cilat kanë paralajmëruar se mund të ndërhyjnë, duke rritur më tej tensionet ndërkombëtare rreth situatës në Iran, shkruan Reuters.
