Partia Demokratike i është drejtuar sot Gjykatës Kushtetuese, duke kundërshtuar zgjedhjen e Endri Shabanit në postin e Avokatit të Popullit.
PD kërkon shfuqizimin e vendimit për zgjedhjen e Shabanit, si edhe pezullimin e tij të menjëhershëm nga detyra, deri në marrjen e një vendimi përfundimtar nga Gjykata Kushtetuese.
Endri Shabani u zgjodh Avokat i Popullit më 11 dhjetor, në një seancë plenare të shoqëruar me debate dhe tensione. Gjatë procesit, Partia Demokratike pretendoi se kishte tërhequr firmat e dhëna më herët në mbështetje të kandidaturës së tij, duke e cilësuar procedurën të pavlefshme.
Çështja pritet të shqyrtohet nga Gjykata Kushtetuese, e cila do të vendosë mbi ligjshmërinë e zgjedhjes dhe kërkesën për pezullim nga detyra.
