Jonathan “Rambo” Bouchard, një 32-vjeçar i njohur për policinë në Saguenay-Lac-Saint-Jean, Kebek, u gjet i vdekur mëngjesin e 6 janarit 2026 në lagjen “5 de Diciembre” të Puerto Vallarta-s, Jalisco, Meksikë.
Një ose më shumë persona të armatosur qëlluan disa herë drejt tij, duke e goditur dy herë në kokë pasi ai doli nga një palestër në rrugën Jamaica.
Vrasja e tij besohet të jetë pjesë e luftës për territor në Kebek, e cila vazhdon prej disa vitesh. Kjo luftë, teksa është shtrirë edhe në vende të tjera, është pagëzuar si Royalty Ëar nga mediat e Montrealit, pasi vrasjet duket se kryhen për përqindjet që paguhen për dërgesat e drogës.
Vrasja ndodhi në rrugën Jamaica, midis rrugëve Brasilia dhe Guatemala, pak qindra metra larg palestres Xavic.
Kush ishte Jonathan Bouchard?
Ish-banori i Saguenay ishte dënuar veçanërisht disa herë në vitet e fundit me burgim për trafik droge. Fillimisht, në moshën 19-vjeçare, ai u dënua me 30 muaj burg gjatë operacionit “Insulin” në vitin 2013, dhe më pas me 40 muaj paraburgim pas arrestimit të tij gjatë operacionit “Palme” në vitin 2019.
Bouchard ishte i përfshirë në shpërndarje, duke transportuar sasi të mëdha droge nga Montreali drejt rajonit, përfshirë njërën nga dërgesat e tij të fundit prej 26,000 tabletash metamfetaminë, e cila u sekuestrua nga policia.
Gjatë operacionit u arrestuan edhe nëna e tij, vëllai dhe tre bashkëpunëtorë të tjerë. Në atë kohë, Sûreté du Québec (SQ) e përshkroi Bouchard-in si “shpërndarësin kryesor të kokainës, metamfetaminës, kanabisit, hashishit dhe medikamenteve të falsifikuara nga Montreali”.
Avokati i tij mbrojtës, Pierre Gagnon, pasi mësoi për vrasjen e tij në Meksikë, kujtoi se njeriu i mbiquajtur “Rambo” në botën e krimit ishte një klient i respektueshëm që vlerësonte punën e bërë nga avokati i tij.
Gjatë viteve të fundit, raportohet se Jonathan Bouchard i kishte mbijetuar të paktën një atentati për vrasje. Dy vjet më parë në Montreal, ai ishte ftuar në një takim nga një i njohur, por kishte dyshuar për diçka. Bouchard nuk shkoi i vetëm në takim dhe kishte marrë masën paraprake të vishte një antiplumb.
Ai kishte një çështje gjyqësore në pritje në Montreal dhe siç duket po fshihej në Puerto Vallarta, shkruan Borderland Beat.
