Arabia Saudite planifikon të hapë tregjet e saj financiare për të gjithë investitorët e huaj nga 1 shkurti, deklaroi rregullatori i tregut të vendit të Gjirit të martën, ndërsa po lehtëson rregullat për të tërhequr më shumë kapital nga jashtë.
Amendamentet e miratuara nga Autoriteti i Tregjeve të Kapitalit (CMA) eliminojnë konceptin e “Investitorit të Huaj të Kualifikuar”, duke shfuqizuar rregullin që lejonte vetëm investitorët ndërkombëtarë me qasje të drejtpërdrejtë dhe të qëndrueshëm në tregun saudit të kapitalit.
Kjo lëvizje do t’u lejojë investitorëve nga e gjithë bota të investojnë drejtpërdrejt në tregun e kapitalit, tha CMA në një deklaratë, duke shtuar se kjo do mbështesë flukset hyrëse dhe do përmirësojë likuiditetin e tregut.
Arabia Saudite, e cila ka kaluar më shumë se gjysmën e rrugës së një plani ekonomik për të ulur varësinë nga nafta, është përpjekur të tërheqë investitorë të huaj, përfshirë krijimin e fondeve të tregtuara në bursë (ETF) me partnerë aziatikë në Japoni dhe Hong Kong.
Vitin e kaluar, rregullatorët hapën gjithashtu derën që të huajt të blejnë firma të listuara që zotërojnë pasuri të paluajtshme në Mekë dhe Medine, pa ndryshuar kufizimet mbi pronësinë e drejtpërdrejtë të tokës.
JP Morgan tha se pret që ndikimi i lëvizjes së të martës të jetë i kufizuar, pasi “pothuajse të gjithë” investitorët institucionalë ishin tashmë të lejuar të investonin në treg.
Aksionet saudite u rritën në shtator pas një raporti se CMA mund të lehtësonte tavanin prej 49% të pronësisë së huaj në firmat e listuara, në një lëvizje që mund të ndihmojë në ringjalljen e interesit në bursën më të madhe të botës arabe, shkruan Reuters.
