Prokurorët italianë kanë bërë të ditur se kanë arrestuar nëntë persona nën dyshimin se kanë financuar Hamasin përmes organizatave bamirëse me bazë në Itali, në një operacion të koordinuar nga strukturat kundër mafies dhe terrorizmit.
Sipas një deklarate të Prokurorisë në qytetin verior të Xhenovës, të arrestuarit akuzohen për “përkatësi dhe financim” të grupit palestinez Hamas, i cili nga Bashkimi Evropian është shpallur organizatë terroriste, përcjell Reuters.
Autoritetet thanë se të dyshuarit kanë devijuar rreth 7 milionë euro, të mbledhura gjatë dy viteve të fundit për qëllime të deklaruara humanitare, drejt entiteteve të lidhura me Hamasin.
Gjatë operacionit, policia ka sekuestruar asete me vlerë mbi 8 milionë euro.
Hetimi nisi pasi u identifikuan transaksione financiare të dyshimta dhe më pas u zgjerua përmes bashkëpunimit me autoritetet holandeze dhe vende të tjera të Bashkimit Evropian, nën koordinimin e agjencisë gjyqësore të BE-së, Eurojust.
Kryeministrja italiane, Giorgia Meloni, falënderoi autoritetet për atë që e cilësoi si “një operacion veçanërisht kompleks dhe të rëndësishëm”, duke theksuar se ai kishte zbuluar financimin e Hamasit përmes “të ashtuquajturave organizata bamirëse”.
Zyra e kryeministrit izraelit nuk iu përgjigj menjëherë një kërkese për koment.
Mbështetja e Melonit për Izraelin gjatë luftës së tij me Hamasin në Gaza ka nxitur protesta të mëdha dhe të përsëritura në Itali.
Sipas ministrisë së Shëndetësisë në Gaza, sulmet izraelite kanë shkaktuar vdekjen e më shumë se 71 mijë personave.
Lufta nisi pas sulmit të udhëhequr nga Hamasi në Izraelin jugor më 7 tetor 2023, ku u vranë rreth 1.200 persona, sipas të dhënave izraelite.
