Një gjykatës federal rrëzoi të hënën politikat e shkollave të Kalifornisë që pengojnë shkollat të zbulojnë identitetin gjinor të një nxënësi te prindërit e tyre.
Padia kolektive, e ngritur nga mësues dhe prindër të Kalifornisë, kërkonte shfuqizimin e politikave që ndalonin edukatorët e ciklit fillor dhe të mesëm të informonin prindërit kur nxënësit përdornin emra ose përemra të ndryshëm nga ata të caktuar në lindje.
Gjykatësi i Rrethit të SHBA-së në San Diego, Roger Benitez, i emëruar nga George W. Bush, vendosi në favor të dy mësueseve të Distriktit Shkollor të Bashkuar Escondido, Elizabeth Mirabelli dhe Lori Ann West, të cilat argumentuan se politikat e distriktit të tyre “ndalonin kategorikisht mësuesit të respektonin dëshirat e prindërve”.
Në padinë e ngritur në prill të vitit 2023, mësueset e shkollës së mesme emëruan disa zyrtarë të distriktit dhe pretenduan se politikat shkelnin të drejtat e tyre kushtetuese dhe fetare. Zyrtarët shtetërorë të Kalifornisë të përfshirë në padi ishin Superintendentja e Shtetit, Tony Thurmond, Prokurori i Përgjithshëm, Rob Bonta dhe Bordi Shtetëror i Edukimit.
Vendimi i dhënë nga Benitez zbatohet për të gjitha shkollat publike të Kalifornisë, jo vetëm për distriktin ku u ngrit padia. Gjykatësi shkroi në urdhrin e tij se sistemi i shkollave publike të Kalifornisë vendosi një “barrierë komunikimi midis prindërve dhe mësuesve”.
“Prindërit dhe kujdestarët kanë një të drejtë kushtetuese federale për t’u informuar nëse fëmija i tyre nxënës në shkollën publike shpreh mospërputhje gjinore,” shkroi Benitez.
“Mësuesit dhe stafi i shkollës kanë një të drejtë kushtetuese federale për të informuar saktë prindin ose kujdestarin kur nxënësi shpreh mospërputhje gjinore.”
Benitez iu referua vendimit të Gjykatës së Lartë të SHBA-së në çështjen Mahmoud v. Taylor të kësaj vere, i cili u dha prindërve të shkollave publike të drejtën për t’u tërhequr nga materialet dhe diskutimet që bien ndesh me besimet e tyre fetare.
Sipas raportimeve nga EdSource, ndonëse vendimi i Benitez iu referua udhëzimeve të Departamentit të Arsimit të Kalifornisë, ai deklaroi se kjo çështje nuk fokusohet te ligji “AB 1955”, i cili ndalonte detyrimin e mësuesve për të zbuluar identitetin gjinor të nxënësve të tyre.
Në përgjigje të më shumë se dhjetë bordeve shkollore që miratuan politika njoftimi për prindërit, Guvernatori Gavin Neësom nënshkroi në vitin 2024 ligjin SAFETY Act.
Firma ligjore konservatore katolike me qendër në Çikago që mori çështjen, Thomas More Society, e cilësoi vendimin si një “fitore historike”.
“Sot i jepet fund përgjithmonë regjimit të rrezikshëm dhe antikushtetues të Kalifornisë për politikat e fshehtësisë gjinore në shkolla,” tha Paul Jonna nga kjo shoqëri.
Nga ana tjetër, kaukusi LGBTQ i Kalifornisë argumentoi se vendimi i gjykatësit “injekton qëllimisht konfuzion” dhe sinjalizon një vullnet alarmues për të minuar të drejtat kushtetuese për privatësi. Organizata ACLU e Kalifornisë Jugore e kritikoi vendimin duke e quajtur pjesë të një “sulmi të bashkërenduar mbarëkombëtar ndaj personave trans”.
Prokurori i Përgjithshëm Bonta dorëzoi të hënën një kërkesë për të pezulluar urdhrin e gjykatës, duke pretenduar se gjykata e rrethit zbatoi gabim ligjin dhe se vendimi do të përmbyset në apel, shkruan Fox News.
