Partia Demokratike do të zhvillojë sot, duke nisur nga ora 18:00, protestën e shpallur si “protestë kombëtare”, e cila do të mbahet në bulevardin “Dëshmorët e Kombit”, përballë Kryeministrisë.
Ky tubim vjen pas pesë protestave të njëpasnjëshme që janë zhvilluar javët e fundit pranë zyrës së kryeministrit Edi Rama, protesta për të cilat është vënë re një rënie e vazhdueshme e pjesëmarrjes.
Sipas organizatorëve, protesta e sotme synon rrëzimin e qeverisë aktuale. Kreu i Partia Demokratike, Sali Berisha, ka deklaruar se protesta do të jetë pa afat dhe se nuk përjashtohet mundësia e përshkallëzimit të aksionit politik deri në grevë urie.
Megjithatë, referuar protestave të mëparshme të zhvilluara në të hënat e fundit, pjesëmarrja e qytetarëve ka qenë në rënie, ndërsa është raportuar se edhe mbështetja nga militantët e PD-së ka qenë më e vakët.
Ndërkohë, Policia e Tiranës ka bërë të ditur se ka hartuar një plan masash për garantimin e rendit dhe sigurisë, si dhe për menaxhimin e qarkullimit rrugor.
Duke nisur nga ora 14:00, nuk do të lejohet parkimi i automjeteve në bulevardin “Dëshmorët e Kombit”, në sheshin “Nënë Tereza”, në rrugën “Ismail Qemali”, në segmentin nga kryqëzimi i Rrugës së Elbasanit me rrugën “Ibrahim Rugova”, si edhe në rrugën “Papa Gjon Pali II”, bulevardin “Zhan D’Ark” dhe bulevardin “Bajram Curri”.
Po ashtu, nga ora 14:00 deri në përfundim të protestës, do të bllokohet qarkullimi i automjeteve në bulevardin “Dëshmorët e Kombit”, nga kryqëzimi pranë Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.
Policia ka paralajmëruar se, në varësi të ecurisë së tubimit, mund të ketë kufizime edhe në akse të tjera rrugore, ndërsa për të lehtësuar lëvizjen e qytetarëve janë parashikuar devijime në rrugë alternative.
