Një punonjës i Pallatit Élysée Palace në Paris është arrestuar nën akuzën se ka vjedhur enë argjendi dhe porcelani me vlerë deri në 40 mijë euro, në kuadër të një vale vjedhjesh që ka prekur së fundmi institucione prestigjioze franceze.
Sipas autoriteteve hetimore, i arrestuari, i punësuar si përgjegjës për argjendarinë (silver steward), u ndalua javën e kaluar së bashku me dy persona të tjerë, të dyshuar si bashkëpunëtorë.
Ata akuzohen se kanë marrë sende nga rezidenca zyrtare e presidentit francez dhe janë përpjekur t’i shesin ato përmes faqeve të ankandeve online, përfshirë platformën Vinted, përcjell The Guardian.
Alarmi u dha nga përgjegjësi kryesor i shërbimit të enëve në Pallatin Élysée, i cili konstatoi mungesën e disa objekteve, një pjesë e të cilave konsiderohen pasuri e trashëgimisë kombëtare. Vlera totale e sendeve të zhdukura vlerësohet deri në 40 mijë euro.
Shumica e objekteve të vjedhura i përkasin Manufakturës së famshme Sèvres Manufactory, fabrikë porcelani në pronësi të shtetit francez që prej vitit 1759.
Hetimet nisën pasi punonjës të kësaj manufakture identifikuan disa nga objektet e zhdukura të hedhura në shitje në faqet e ankandeve online.
Këto vjedhje vijnë në një moment delikat për autoritetet franceze, pas një serie grabitjesh të bujshme nga muze dhe institucione kulturore, përfshirë edhe Louvre, çka ka ngritur shqetësime serioze për nivelin e sigurisë dhe mbrojtjen e trashëgimisë kulturore në vend.
Roli i “silver steward”-it përfshin ruajtjen dhe administrimin e enëve dhe objekteve që përdoren nga presidentët, anëtarë të familjeve mbretërore në vizitë dhe personalitete të larta shtetërore.
Prokuroria ka bërë të ditur se regjistrat e inventarit të mbajtur nga i arrestuari krijonin dyshime se ai po planifikonte edhe vjedhje të tjera në të ardhmen.
Sipas hetuesve, në llogarinë e tij në Vinted janë gjetur objekte si një pjatë me vulën “Forcat Ajrore Franceze” dhe tavëllë me shenjën e Manufakturës së Sèvres, sende që normalisht nuk gjenden në tregun e lirë.
Gjatë kontrolleve në banesën, automjetin dhe dollapin personal të të dyshuarit, autoritetet kanë sekuestruar rreth 100 objekte, përfshirë porcelan Sèvres, një statujë të René Lalique, gota shampanje Baccarat dhe enë bakri kuzhine.
Punonjësi i Pallatit Élysée dhe dy bashkëpunëtorët e tij u paraqitën në gjykatë më 18 dhjetor dhe pritet të dalin në gjyq më 26 shkurt.
Ata janë lënë nën mbikëqyrje gjyqësore, me ndalim kontakti mes tyre, ndalim pjesëmarrjeje në ankande dhe pezullim nga aktivitetet profesionale, raportoi Associated Press.
Objektet e sekuestruara janë rikthyer tashmë në Pallatin Élysée, një përfundim më pozitiv krahasuar me rastin e Luvrit, ku ende mungojnë stoli të kurorës me vlerë rreth 88 milionë euro, pas një grabitjeje në mes të ditës në tetor, për të cilën janë arrestuar katër persona.
Ndërkohë, edhe institucione të tjera kulturore franceze janë shënjestruar muajt e fundit. Muzeu i Historisë Natyrore në Paris dhe një muze porcelani në Limoges u grabitën në shtator, duke humbur respektivisht gjashtë copa ari me vlerë rreth 1.5 milionë euro dhe porcelan kinez me vlerë të përbashkët 6.55 milionë euro. Në tetor, rreth 2 mijë monedha ari dhe argjendi me vlerë rreth 90 mijë euro u vodhën nga Maison des Lumières në Langres, muze i dedikuar filozofit Denis Diderot.
