Izraeli shpreh shqetësim se grupi terrorist Hamas mund të kryejë një çarmatim simbolik, duke dorëzuar vetëm disa armë të vjetruara nën presionin e ndërmjetësve ndërkombëtarë, për të krijuar një përshtypje të rreme për progres në armëpushim, ndërsa mban pjesën më të madhe të arsenalit të tij, thanë zyrtarët izraelitë për YNetNews të shtunën.
Sipas planit të paqes të propozuar nga presidenti amerikan Donald Trump, Faza e Dytë e marrëveshjes kërkon që Izraeli të tërhiqet nga zona e njohur si “linja e verdhë” në Gaza, e cila do t’i dorëzohet një force ndërkombëtare.
Ndërkohë, i dërguari i Trump, Steve Witkoff, u takua në Miami me përfaqësues nga Katar, Egjipti dhe Turqia për të diskutuar avancimin në fazën tjetër të marrëveshjes. Ministri i Jashtëm turk, Hakan Fidan, gjithashtu mori pjesë në bisedime.
Pas takimit, vendet ndërmjetësuese nxorrën një deklaratë të përbashkët duke shprehur mbështetjen për krijimin dhe aktivizimin e afërt të Bordit të Paqes, si organ tranzitor qeverisës në Gaza. Deklarata thekson se faza e parë ka sjellë përparim, përfshirë zgjerimin e ndihmave humanitare, kthimin e mbetjeve të disa të kapurve, një tërheqje të pjesshme të trupave dhe ulje të përshkallëzimit të dhunës.
Në bisedimet për Fazën e Dytë, palët kanë diskutuar mundësinë e krijimit të një organi qeverisës në Gaza nën autoritet të unifikuar lokal, me qëllim mbrojtjen e civilëve dhe ruajtjen e rendit publik.
Zyrtarët izraelitë theksojnë se qeveria nuk do të pranojë gjë tjetër përveç një çarmatimi të plotë dhe të verifikueshëm të Hamasit, duke refuzuar çdo veprim simbolik që nuk garanton sigurinë e Izraelit. Ata gjithashtu shprehen shqetësim për presionin e SHBA-së për të kaluar në fazën tjetër para se të kthehen mbetjet e të kapurit Ran Gvili, që ende mbahen nga Hamas.
Turqia ka theksuar gjatë takimeve se faza e parë e planit të paqes është duke u zbatuar dhe ka diskutuar kalimin në fazën e dytë, duke përfshirë rolin e Bordit të Paqes dhe forcën ndërkombëtare stabilizuese. Megjithatë, Izraeli ka vendosur veto të plotë ndaj çdo angazhimi të trupave turke në Gaza.
Pas miratimit të marrëveshjes 35 miliardë dollarëshe për gazin midis Izraelit dhe Egjiptit, disa vëzhgues sugjeruan mundësinë e një samiti trilateral në rezidencën e Trump në Florida, duke përfshirë Trump, Netanyahu dhe presidentin egjiptian Abdel Fattah el-Sisi, por një takim i tillë mbetet ende i pasigurt.
Zyrtarët izraelitë po ashtu paralajmërojnë se në takimin e ardhshëm mes Netanyahu dhe Trump do të diskutohet situata në Gaza dhe zbatimi i planit të paqes, çështjet në Siri dhe Liban, si dhe mundësitë për normalizim me Arabinë Saudite. Netanyahu pritet gjithashtu të ngrejë shqetësime lidhur me prodhimin e raketave balistike nga Irani dhe të propozojë opsione për veprime të reja ushtarake.
