Kompania kineze ByteDance ka nënshkruar të enjten marrëveshje detyruese për t’ia kaluar kontrollin e operacioneve amerikane të TikTok-ut një grupi investitorësh, përfshirë gjigantin e teknologjisë Oracle, në një hap vendimtar për të shmangur ndalimin e aplikacionit në Shtetet e Bashkuara dhe për t’i dhënë fund pasigurisë disavjeçare rreth të ardhmes së tij.
Sipas marrëveshjes, investitorë amerikanë dhe ndërkombëtarë do të zotërojnë 80.1% të aksioneve të shoqërisë së re “TikTok USDS Joint Venture LLC”, ndërsa ByteDance do të mbajë 19.9%, përcjell Reuters.
Mes investitorëve kryesorë janë Oracle, fondi i kapitalit privat Silver Lake dhe kompania MGX me bazë në Abu Dhabi. Kushtet financiare të marrëveshjes nuk janë bërë publike, ndërsa vlerësimi i kompanisë së re amerikane është përmendur më herët rreth 14 miliardë dollarë.
Marrëveshja synon të adresojë shqetësimet e sigurisë kombëtare të SHBA-së lidhur me mbrojtjen e të dhënave të përdoruesve dhe kontrollin e algoritmit të TikTok-ut.
Sipas një memorandumi të brendshëm të TikTok-ut, drejtori ekzekutiv Shou Zi Chew u ka thënë punonjësve se ndërmarrja e përbashkët do të funksionojë si entitet i pavarur, me autoritet mbi mbrojtjen e të dhënave amerikane, sigurinë e algoritmit, moderimin e përmbajtjes dhe garantimin e softuerit.
Oracle do të ketë rolin e “partnerit të besuar të sigurisë”, duke audituar dhe verifikuar përputhshmërinë me standardet e sigurisë dhe duke garantuar që të dhënat sensitive të përdoruesve amerikanë të ruhen në cloud-in e saj brenda SHBA-së.
Ndërkohë, entitetet amerikane të TikTok-ut të kontrolluara nga ByteDance do të vazhdojnë të menaxhojnë veprimtari komerciale globale si tregtia elektronike, reklamat dhe marketingu, të ndara nga ndërmarrja e re e përbashkët.
Marrëveshja vjen pas vitesh përplasjesh politike që nisën në vitin 2020, kur presidenti amerikan Donald Trump tentoi për herë të parë ndalimin e aplikacionit për arsye sigurie kombëtare.
TikTok përdoret rregullisht nga më shumë se 170 milionë amerikanë dhe ky hap shihet si një moment kyç për vazhdimësinë e tij në tregun amerikan.
Megjithatë, pyetje mbeten mbi rolin e vazhdueshëm të ByteDance dhe kontrollin real mbi algoritmin. Disa ish-zyrtarë amerikanë kanë shprehur dyshime nëse algoritmi është transferuar plotësisht apo thjesht monitorohet nga partnerët amerikanë.
Marrëveshja pritet të mbyllet më 22 janar dhe, nëse finalizohet, do të shënojë fundin e përpjekjeve shumëvjeçare për detyrimin e ByteDance të shkëpusë TikTok-un nga pronësia kineze për arsye sigurie.
