Komisioni i Disiplinës dhe Etikës pranë FSHF-së ka bërë publike vendimet për shkeljet e konstatuara në ndeshjet e fundit të futbollit shqiptar në të gjitha kategoritë. Për sjellje të gabuar të tifozëve dhe mosrespektim të rregulloreve, disa klube janë ndëshkuar me gjoba financiare dhe masa disiplinore.
KF Vllaznia është gjobitur me 50 mijë lekë për hedhje sendesh në fushë dhe përdorim të mjeteve piroteknike nga tifozët. Me të njëjtën masë është ndëshkuar edhe KF Tirana për vonesa në fillimin e ndeshjes dhe mosrespektim të detyrimeve organizative. Gjobë prej 50 mijë lekësh ka marrë edhe KF Teuta për shkelje të rregullave të sigurisë, duke lejuar persona të paautorizuar në ambientet e stadiumit.
Ndëshkimi më i rëndë i është dhënë KF Iliria, e cila është gjobitur me 100 mijë lekë dhe është dënuar të zhvillojë pesë ndeshje pa praninë e spektatorëve, për shkelje të rënda të rendit dhe sigurisë, si dhe për sjellje fyese të tifozëve ndaj zyrtarëve të ndeshjes. Po ashtu, lojtari Brajan Selmani është pezulluar për 10 ndeshje, ndërsa zyrtarët e klubit kanë marrë dënime me pezullim.
Masa disiplinore janë marrë edhe ndaj lojtarëve dhe zyrtarëve të klubeve të tjera, përfshirë Skënderbeun, Laçin, Lushnjën, Kukësin dhe ekipet e moshave U-16, për sjellje josportive, dhunë dhe shkelje të rregullave të sigurisë.
FSHF ka theksuar se këto vendime synojnë garantimin e rendit, sigurisë dhe respektimit të rregulloreve gjatë zhvillimit të aktiviteteve sportive në vend.
