Tyler Robinson, i akuzuar për vrasjen e themeluesit të Turning Point USA, Charlie Kirk, u shfaq për herë të parë fizikisht në gjykatë të enjten, pothuajse tre muaj pas arrestimit të tij. Më parë, Robinson kishte marrë pjesë në seancat gjyqësore përmes video ose audio lidhjeve nga burgu, përcjell Fox News.
Seanca e fundit shënon hapin më të rëndësishëm deri tani në rast, teksa media dhe bashkëshortja e Kirk kanë shprehur shqetësim për rritjen e sigurisë rreth procedurave.
Gjykata në Qarkun Utah mori masa të rrepta sigurie për këtë seancë: hyrja dhe dalja për publikun ishte e kontrolluar, dera kryesore e gjykatës ishte e kyçur dhe pranë ambienteve ndodheshin mjete të blinduara të SWAT-it dhe automjete të tjera të policisë.
Robinson, i veshur me këmishë dhe kravatë, nuk shfaqi emocione të dukshme gjatë fillimit të seancës. Gjykatësi Tony Graf kaloi menjëherë seancën në modalitet të mbyllur, duke larguar publikun. Pas rreth dy orësh, media u lejua të rikthehej në sallë, ndërkohë që u vendosën masa për të shmangur shfaqjen e kufizimeve të tij fizike dhe të familjarëve në kamerat e gjykatës.
Seanca përfshiu shqyrtimin e regjistrimit audio dhe transkriptit të seancës së mbyllur të tetorit, si dhe amendamentet e mundshme të urdhrit për heshtje (“gag order”). Avokati i pavarur dhe analisti ligjor, Roger Bonakdar, vuri në dukje se shkëputja e papritur e transparencës është e pazakontë, duke theksuar se fillimisht informacioni për hetimin ishte i bollshëm, por më pas u kufizua ndjeshëm.
Erika Kirk, bashkëshortja e viktimës, ka shprehur shqetësim për mungesën e kamerave gjatë seancave, duke theksuar se bashkëshorti i saj u vra para turmës dhe publiku ka të drejtë të ketë qasje në informacion. Ajo tha:
“Nuk kam asgjë për t’i thënë atij. Por nuk mund të lejoj që kjo të më konsumojë. Vranë burrin tim. Çdo ditë duhet t’i shpjegoj vajzës time pse babai nuk po kthehet.”
Bonakdar shtoi se masa për kufizimin e shfaqjes së të akuzuarit në lidhje me veshjen e burgut apo prangat janë për të ruajtur drejtësinë dhe perceptimin e paanshmërisë së gjyqit, edhe pse rastet e tilla zakonisht lejojnë më shumë transparencë.
Seanca e së enjtes u përqendrua kryesisht tek urdhri i mëparshëm për mbyllje të dokumenteve dhe procedurat mediatike, ndërsa gjykata synon të mbrojë integritetin e gjyqit pa cenuar të drejtën e mediave dhe publikut. Rasti është i ndërlikuar politikisht dhe mund të zgjasë edhe një vit ose më shumë deri në gjykim.
