Autoritetet indiane kanë nisur një hetim të plotë për të zbuluar shkakun e zjarrit tragjik që përfshiu një klub të njohur nate në shtetin Goa, ku humbën jetën të paktën 25 persona, mes tyre edhe turistë, dhe u plagosën gjashtë të tjerë, përcjell Euronews.
Zjarri shpërtheu pak pas mesnatës në fshatin Arpora, një zonë e njohur për jetën e natës që tërheq edhe turistë të huaj, rreth 25 kilometra larg kryeqytetit Panaji. Kryeministri i Goa-s, Pramod Sawant, tha se shumica e viktimave ishin punonjës të kuzhinës së klubit, ndërsa në mesin e tyre kishte edhe 3–4 turistë. Të gjashtë personat e plagosur ndodhen në gjendje të qëndrueshme.
Fillimisht u raportua se zjarri ishte shkaktuar nga shpërthimi i një bombole gazi, por dëshmitarë okularë thanë se flakët nisën nga kati i parë, ku gati 100 turistë po kërcejnë, duke shkaktuar panik masiv. Shumë prej tyre u drejtuan me vrap drejt kuzhinës në katin poshtë dhe u bllokuan së bashku me stafin.
Sawant njoftoi se është ngritur një komision hetimor për të përcaktuar saktësisht shkaqet e zjarrit dhe nëse klubi kishte respektuar rregullat e sigurisë dhe ndërtimit. Ai premtoi masa të rrepta ndaj çdo përgjegjësi në rast se zbulohet neglizhencë.
Kryeministri indian Narendra Modi shprehu ngushëllimet e tij përmes një mesazhi në X, duke e quajtur ngjarjen “thellësisht tronditëse”.
Operacionet e shuarjes së zjarrit u vështirësuan nga hyrja dhe dalja shumë e ngushtë e ndërtesës, duke detyruar zjarrfikësit të parkonin rreth 400 metra larg vendit të ngjarjes. Media lokale raportoi gjithashtu se godina e klubit kishte marrë më herët një urdhër për prishje për mungesë lejesh ndërtimi, urdhër që më pas ishte tërhequr nga zyrtarë të lartë të Goa-s.
Ngjarja ka sjellë edhe reagime politike. Rahul Gandhi ka kërkuar një hetim tërësisht transparent “për të vendosur përgjegjësinë dhe për të parandaluar tragjedi të parandalueshme në të ardhmen”.
Tragjedia risjell në vëmendje numrin e lartë të incidenteve të ngjashme në Indi, të shkaktuara shpesh nga bombola gazi ose qarkëprerje elektrike, duke theksuar nevojën për masa më të forta sigurie.
