Hamas nuk do të dorëzojë armët, nuk do të heqë dorë nga qeverisja e Rripit të Gazës dhe nuk do të pranojë asnjë formë mbikëqyrjeje të jashtme, përfshirë Forcën Ndërkombëtare të Stabilizimit (ISF), deklaroi lideri i lartë i Hamasit, Khaled Mashaal, gjatë një fjalimi me video në konferencën “Pledge to Jerusalem” të mbajtur në Stamboll të dielën, përcjell JPost.
Ministria e Jashtme e Izraelit publikoi pjesë nga fjalimi i Mashaalit dhe e cilësoi deklaratën e tij si një “kontradiktë të drejtpërdrejtë me termat themelorë të planit të paqes” të administratës amerikane.
“Hamas po tall planin e paqes të presidentit Donald Trump,” reagoi ministria izraelite.
Në videon e shpërndarë, Mashaal theksoi se:
“Mbrojtja e projektit të rezistencës dhe armëve të rezistencës është e drejta e popullit tonë për t’u vetëmbrojtur. Rezistenca dhe armët e saj janë nderi dhe krenaria e kombit.”
Deklaratat e tij nënvizojnë refuzimin e qartë të Hamasit për t’iu përmbajtur kushteve kryesore të skemave të propozuara ndërkombëtare për stabilizimin e Gazës pas luftës.
Mashaal konsiderohet një nga objektivat kryesorë të sulmeve ajrore të Izraelit në Doha në muajin shtator, që synonin eliminimin e udhëheqjes së lartë të Hamasit të strehuar në Katar.
Ndërkohë, mediat izraelite raportuan se vëllai i tij, Mofid Abdel Kader Mashaal, u lirua papritur vitin e kaluar nga burgu në SHBA, duke shtuar një tjetër element në tensionet e fundit në rajon.
Deklarata e Mashaalit vjen në një moment kyç për bisedimet diplomatike, ndërsa shtetet arabe po kërkojnë një konsensus të ri për të ardhmen e Gazës dhe Uashingtoni po rishikon qasjen e tij në politikën e Lindjes së Mesme.
