Rreth 2900 gjoba janë vendosur nga Policia Rrugore e Tiranës 48 orët e fundit për shkelje të ndryshme.
Gjatë aksionit janë hequr me karrotrec 17 makina për mungesë dokumentesh, parkim të gabuar ose që bllokon qarkullimin.
37 drejtues mjetesh janë proceduar pasi janë kapur në timon nën ndikimin e alkoolit. Ndërkohë 11 shtetas janë arrestuar ose proceduar penalisht për shkelje të ndryshme.
Njoftimi
“Policia Rrugore e Tiranës ka zhvilluar kontrolle gjatë 48 orëve të fundit, me qëllim rritjen e sigurisë rrugore dhe parandalimin e sjelljeve që shpesh çojnë në aksidente të rënda. Kontrollet janë përqendruar kryesisht tek drejtuesit e mjeteve që nuk respektojnë radhën në trafik dhe kryejnë parakalime të rrezikshme.
Me patrulla të vendosura në pikat më problematike të qarkullimit në kryeqytet, si dhe me përdorimin e dronëve, kamerave inteligjente dhe pikave të shumta të matjes së shpejtësisë, Policia Rrugore ka konstatuar një sërë shkeljesh.
Gjatë 48 orëve të fundit, janë regjistruar:
-136 masa administrative për mosrespektim të radhës dhe parakalime të rrezikshme, në zbatim të nenit 174/2/b të Kodit Rrugor – një nga shkeljet më të zakonshme që çon në aksidente të rënda.
-17 mjete të hequra me karrotrec, për mungesë dokumentacioni, modifikime të paligjshme ose parkim të parregullt që pengonte qarkullimin.
-37 drejtues mjetesh të kapur nën ndikimin e alkoolit, të cilët u proceduan sipas ligjit për shkak të rrezikut që paraqisnin për sigurinë publike.
-2758 masa administrative për parkime të gabuara, një problem i përhapur që vijon të shkaktojë bllokime dhe ngarkesë të panevojshme në trafik.
-11 shtetas të arrestuar ose proceduar penalisht për vepra të ndryshme në fushën e qarkullimit rrugor.”
