Grupi Parlamentar i Partisë Demokratike ka paraqitur në Kuvend një kërkesë për interpelancë urgjente me kryeministrin Edi Rama.
Kjo vjen pas padisë që qeveria ka depozituar në Gjykatën Kushtetuese për pezullimin e vendimit të GJKKO-së, e cila ka urdhëruar pezullimin nga detyra të ministres Belinda Balluku.
Sipas PD-së, veprimi i qeverisë është antikushtetues dhe përbën ndërhyrje në drejtësi. Opozita thotë se në një vend europian, një ministër i marrë i pandehur për abuzim me fonde publike do të shkarkohej menjëherë, e jo të mbrohej nga kryeministri.
“Një kërkesë e tillë e Kryeministrit të Shqipërisë jo vetëm që është e pabazuar në Kushtetutë, por gjithashtu përbën një ndërhyrje të papërshtatshme në pavarësinë e sistemit të drejtësisë dhe synon cimentimin e kulturës së pandëshkueshmërisë në vend.
Në një sjellje normale, në një vend anëtar të NATO-s dhe vend kandidat për anëtarësim në Bashkimin Europian, Kryeministri duhej të kishte propozuar menjëherë shkarkimin nga detyra të një ministri që është marrë i pandehur për abuzime në disa procedura prokurimi publik, me vlerë miliona euro, dhe kurrsesi nuk mund të sillet si zyrë avokatie për një të pandehur.”
