Deputetja Jorida Tabaku ka reaguar në Facebook me akuza ndaj qeverisë për keqmenaxhimin e procesit të rindërtimit pas tërmetit të vitit 2019. Ajo tha se periudha që duhej të ishte rimëkëmbje u kthye në “mundësi abuzimi”, ndërsa kostoja e rindërtimit ka arritur në 1.3 miliardë euro, me shumë projekte ende të papërfunduara.
“Ajo që duhej të ishte një periudhë e përbashkët rimëkëmbjeje u kthye, për fat të keq, në një oportunitet abuzimi për qeverinë socialiste.
Ndërsa komuniteti ndërkombëtar u mobilizua me grante dhe kredi të buta, qeveria premtoi zgjidhje të shpejta dhe rindërtim brenda pak vitesh.
Sot, bilanci është tronditës: kosto të fryra mbi 1.3 miliardë euro dhe mijëra familje ende pa një banesë të përfunduar.”
Tabaku u shpreh se qeveria ka kryer tenderime pa fonde reale në buxhet, duke fryrë kostot dhe duke anashkaluar fondet më transparente dhe më të lira të BE-së.
Ajo solli si shembull diferencën në çmim të shkollave të ndërtuara me fondet e BE-së (600 mijë euro) dhe atyre me buxhetin e shtetit (2.2 milionë euro).
Sipas saj, pesë vite pas tragjedisë, “shqiptarët janë edhe në borxh, edhe ende pa strehë”, ndërsa procesi i rindërtimit është shndërruar në “refren elektoral të dështimit”.
“Pesë vite pas tragjedisë, e vërteta është e hidhur: Shqiptarët janë edhe në borxh, edhe ende pa strehë. Tërmeti u kthye në një mundësi për të pasuruar pakicën në pushtet, ndërsa shumica e qytetarëve paguan faturën.”
Postimi:
Pesë vite më parë, vendi ynë u godit nga tragjedia e tërmetit që la pa strehë qindra familje dhe krijoi një traumë kolektive të pashlyeshme për të gjithë shqiptarët.
Ajo që duhej të ishte një periudhë e përbashkët rimëkëmbjeje u kthye, për fat të keq, në një oportunitet abuzimi për qeverinë socialiste.
Ndërsa komuniteti ndërkombëtar u mobilizua me grante dhe kredi të buta, qeveria premtoi zgjidhje të shpejta dhe rindërtim brenda pak vitesh. Sot, bilanci është tronditës: kosto të fryra mbi 1.3 miliardë euro dhe mijëra familje ende pa një banesë të përfunduar.
Pse ndodhi kjo?
Sepse qeveria zgjodhi të thyente rregullin bazë të financave publike: u hodh në tenderime pa fonde në buxhet, duke fshehur kostot reale dhe duke i rritur ato artificialisht ditë pas dite. Rezultati ishte absurd:
– Një shkollë e ndërtuar me fondet e BE ka kushtuar rreth 600 mijë euro,
– Ndërsa e njëjta shkollë, e ndërtuar me buxhetin e shtetit, kushtonte 2.2 mln euro sipas Bashkisë Tiranë.
Rindërtimi u kthye në një minierë floriri për qeverinë, ndërsa familjet e prekura u lanë peng i premtimeve të pambajtura.
Për muaj me radhë, qeveria mohoi krizën në financat publike. Derisa u detyrua të pranojë atë që shqiptarët e ndjenë në përditshmëri: 1.3 miliardë euro barrë në buxhet për ndërtime ende të papërfunduara.
Vitet kalojnë, kostoja rritet, dhe mijëra njerëz mbeten ende të pastrehë — ndërsa premtimi i rindërtimit vazhdon të përdoret si refren elektoral i dështimit.
Përse qeveria preferoi të paguante me 1.3 miliardë euro taksat e shqiptarëve dhe jo me fondet e BE?
Për një arsye të thjeshtë: fondet e BE janë më ekonomike, më transparente dhe nuk lejojnë abuzime. Qeveria zgjodhi eurobondet më të shtrenjta, duke i ngarkuar shqiptarët me interesa të larta dhe borxh afatgjatë.
Pesë vite pas tragjedisë, e vërteta është e hidhur:
Shqiptarët janë edhe në borxh, edhe ende pa strehë. Tërmeti u kthye në një mundësi për të pasuruar pakicën në pushtet, ndërsa shumica e qytetarëve paguan faturën.
