Një efektive e Gardës Kombëtare, Sarah Beckstrom, 20 vjeçe nga Virxhinia Perëndimore, ka humbur jetën pasi ajo dhe një tjetër gardist u qëlluan me armë të mërkurën në Washington D.C., njoftoi Presidenti Donald Trump për Fox News.
Gjatë fjalimit të Ditës së Falënderimeve, Trump tha se Beckstrom ishte një vajzë e re e jashtëzakonshme, shumë e respektuar, që kishte nisur shërbimin në qershor të vitit 2023 dhe u sulmua brutalisht, duke humbur jetën. Gardisti i dytë i plagosur, Andrew Wolfe, 24 vjeç, ndodhet ende duke luftuar për jetën e tij dhe sipas presidentit është në gjendje shumë të rëndë. I dyshuari për sulmin, Rahmanullah Lakanwal, një shtetas afgan, i cilësuar nga Trump si “përbindësh”, është gjithashtu në gjendje të rëndë në spital.
Zyrtarë të lartë amerikanë dhe ligjvënës shprehën ngushëllimet e tyre për familjen e Beckstrom. Shefi i Pentagonit Pete Hegseth e quajti atë një heroinë amerikane, ndërsa drejtori i FBI-së Kash Patel bëri thirrje që amerikanët të luten për familjen dhe miqtë e saj.
Prokurorja e SHBA-së për D.C., Jeanine Pirro, tha se Beckstrom dha sakrificën e fundit duke shërbyer në Ditën e Falënderimeve, ndërsa Prokurorja e Përgjithshme Pam Bondi njoftoi se Departamenti i Drejtësisë do të kërkojë dënim me vdekje për të dyshuarin dhe u shpreh e shkatërruar nga humbja e saj. Guvernatori i Virxhinias Perëndimore, Patrick Morrisey, e përshkroi Beckstrom si një të re me kurajo dhe vendosmëri të jashtëzakonshme dhe theksoi se shteti nuk do ta harrojë kurrë sakrificën e saj. Senatorët Jim Justice dhe Shelley Moore Capito thanë se Virxhinia Perëndimore do të qëndrojë pranë familjes dhe komunitetit të Gardës Kombëtare gjatë këtij momenti të dhimbshëm.
Rahmanullah Lakanwal, 29 vjeç, hyri ligjërisht në SHBA në vitin 2021 përmes programit humanitar Operation Allies Welcome, pas tërheqjes së trupave amerikane nga Afganistani. Ai ishte kontrolluar nga CIA në Afganistan për bashkëpunimin e tij me agjencinë dhe kaloi gjithashtu kontrollet e sigurisë për aplikimin e azilit në SHBA, duke rezultuar i pastër në të gjitha verifikimet.
Aplikimi i tij për azil u miratua më herët këtë vit nga administrata Trump. Një raport i qershorit nga Zyra e Inspektorit të Përgjithshëm të Departamentit të Drejtësisë arriti në përfundimin se nuk kishte dështime sistemike në procesin e verifikimit të refugjatëve afganë.
Shërbimi i Shtetësisë dhe Imigracionit të SHBA njoftoi se do të rishqyrtojë kartat e gjelbra të lëshuara për emigrantë nga të gjitha vendet me shqetësim të lartë, përfshirë Afganistanin, dhe ka prezantuar masa të reja të sigurisë për vetting-un e emigrantëve nga vendet me rrezik të shtuar.
