Talibanët thanë të martën se ushtria pakistaneze ka kryer sulme ajrore në lindje të Afganistanit, duke vrarë të paktën 10 civilë, mes tyre nëntë fëmijë, përcjell DW.
Zëdhënësi i Talibanëve, Zabihullah Mujahid, deklaroi se forcat pakistaneze bombarduan shtëpinë e një banori në provincën Khost mbrëmjen e së hënës, ndërsa sulme të tjera goditën Kunar dhe Paktika, duke plagosur katër civilë. Autoritetet pakistaneze nuk kanë komentuar ende.
Sulmet vijnë një ditë pas një shpërthimi vetëvrasës në Peshawar, ku tre oficerë u vranë dhe të paktën 11 u plagosën. Asnjë grup nuk mori përgjegjësinë, por media shtetërore pakistaneze raportoi se autorët ishin shtetas afganë. Presidenti Asif Zardari akuzoi Tehreek-e-Taliban Pakistan (TTP) si “të mbështetur nga të huajt” dhe të strehuar në territor afgan.
Marrëdhëniet mes Afganistanit dhe Pakistanit janë përkeqësuar prej vitit 2021, kur Talibanët morën pushtetin. Përplasjet kufitare në tetor lanë rreth 70 të vrarë në të dy anët e kufirit, ndërsa bisedimet e paqes kanë ngecur. Islamabad kërkon që qeveria talibane të frenojë TTP-në, që po kryen sulme të përgjakshme në Pakistan.
