Rusia ka lëshuar një valë sulmesh ajrore gjatë natës ndaj kryeqytetit ukrainas, Kievit, si dhe qyteteve të tjera, përfshirë rajonin verilindor të Sumit, pavarësisht përpjekjeve të vazhdueshme të SHBA-së për t’i dhënë fund luftës që ka hyrë në vitin e saj të katërt, përcjell Euronews.
Pamjet e publikuara në rrjete sociale treguan ndërtesa banimi të goditura në orët e para të mëngjesit, të cilat më vonë u konfirmuan edhe nga autoritetet lokale. Kryebashkiaku i Kievit, Vitali Klitschko, bëri të ditur se një godinë në distriktin Pechersk dhe një tjetër në distriktin lindor Dniprovskyi kanë pësuar dëme të rënda.
Ministria e Energjisë e Ukrainës njoftoi gjithashtu se infrastruktura energjetike u shënjestrua nga sulmet, por nuk dha detaje mbi nivelin e dëmeve.
Ndërkohë, autoritetet në Sumy raportuan se një dron rus goditi një kamion shërbimi, i cili ishte vendosur aty pas goditjeve të përsëritura ruse të së hënës.
Sulmet e Moskës vijnë vetëm një ditë pas bisedimeve mes përfaqësuesve të SHBA-së dhe Ukrainës në Gjenevë lidhur me një plan paqeje të ndërmjetësuar nga SHBA dhe Rusia.
Oleksandr Bevz, pjesë e delegacionit ukrainas, deklaroi për Associated Press se bisedimet kanë qenë “shumë konstruktive” dhe se palët kanë diskutuar shumicën e çështjeve.
Nga ana tjetër, zëdhënësi i Kremlinit, Dmitry Peskov, tha se Rusia ende nuk e ka parë versionin e përditësuar të planit pas takimeve në Gjenevë.
