Ushtria izraelite thotë se ka vrarë figurën e dytë më të lartë të Hezbollahut në sulmet e para ajrore pas disa muajsh në Bejrutin jugor.
Forcat e Mbrojtjes të Izraelit (IDF) e quajtën Haytham Ali Tabatabain, Shefin e Shtabit të Hezbollahut, “një operativ kyç dhe veteran në organizatën terroriste.”
“Sulmi synonte të parandalonte organizatën nga forcimi i mëtejshëm i aftësive të saj dhe për t’i dhënë një goditje të saktë atyre që përpiqen të dëmtojnë Shtetin e Izraelit,” tha Shefi i Shtabit të IDF-së, Gjenerali Eyal Zamir, në një deklaratë pas sulmit.
Hezbollahu ende nuk ka komentuar publikisht mbi sulmin.
Pesë persona u vranë dhe 28 u plagosën në sulm, sipas Ministrisë së Shëndetësisë Libaneze.
Pamjet nga vendi i ngjarjes treguan tym që dilte nga kati i katërt ose i pestë i një pallati banimi në një pjesë të populluar të Bejrutit jugor.
Zyra e kryeministrit Izraelit Benjamin Netanyahu tha se IDF kishte goditur “në zemër të Bejrutit, duke shënjestruar Shefin e Shtabit të Hezbollahut, i cili udhëhoqi përpjekjet për ngritjen dhe armatimin e organizatës.”
Netanyahu urdhëroi sulmin bazuar në rekomandimin e Ministrit të Mbrojtjes dhe Shefit të Shtabit të IDF-së, tha zyra e tij.
“Ne do vijojmë të veprojmë me forcë për të parandaluar çdo kërcënim ndaj banorëve të veriut dhe ndaj Shtetit të Izraelit,” tha ministri izraelit i Mbrojtjes, Israel Katz, duke shtuar: “Kushdo që ngre dorë kundër Izraelit, dora e tij do pritet.”
https://edition.cnn.com/2025/11/23/middleeast/israel-hezbollah-beirut-strikes-intl
