Kryetari i Partisë Demokratike, Sali Berisha, zhvilloi një takim me Sekretaren e Përgjithshme të Partisë Popullore Evropiane (EPP), Dolors Montserrat, dhe Patrick Voller, Drejtor për Marrëdhëniet me Jashtë. Diskutimet u përqendruan në situatën politike në Shqipëri, të cilën Berisha e cilësoi si një krizë të rëndë të demokracisë, shtetit të së drejtës dhe sigurisë publike, si edhe në rritjen e ndikimit kriminal në institucionet shtetërore.
Gjatë takimit, Berisha deklaroi se Shqipëria “përfaqëson narko-shtetin e parë dhe të vetëm në Evropë”, duke akuzuar kryeministrin Edi Rama për mbështetje politike ndaj grupeve kriminale. Sipas tij, rrjete të organizuara kriminale kanë depërtuar në ekonomi, administratë dhe procese zgjedhore, të dokumentuara sipas PD-së përmes dosjeve të prokurorisë, dokumenteve gjyqësore, investigimeve mediatike dhe operacioneve ndërkombëtare si Sky ECC dhe EncroChat.
Ai theksoi gjithashtu se të ardhurat e aktiviteteve kriminale po pastrohen në sektorin e ndërtimit, duke përdorur si shembull numrin e lartë të kullave të reja që qëndrojnë pjesërisht bosh.
Në takim u diskutua edhe nevoja për një vizitë në terren në Shqipëri nga përfaqësues të PPE-së, vizitë që pritet të realizohet së shpejti për shkak të përkeqësimit të situatës, sipas Berishës.
Sekretarja e Përgjithshme Montserrat shprehu shqetësimin e saj për zhvillimet në vend dhe konfirmoi mbështetjen e PPE për Partinë Demokratike në objektivin për zgjedhje të lira, rikthimin e demokracisë dhe forcimin e shtetit ligjor.
Berisha u shoqërua në takim nga deputetët Albana Vokshi dhe Belind Këlliçi.
