IDF-ja (Forcat e Mbrojtjes së Izraelit) ka ngritur kundërshtime të forta ndaj një shitjeje të mundshme të avionëve luftarakë F-35 nga SHBA-ja te Arabia Saudite, duke paralajmëruar se ky hap mund të dobësojë epërsinë ushtarake të Izraelit në rajon, sipas një dokumenti që pasqyron qëndrimin e Forcave Ajrore që iu dorëzua udhëheqjes politike të dielën.
Dokumenti, i marrë nga Ynet, thotë se epërsia ajrore e Izraelit në Lindjen e Mesme varet nga ruajtja e qasjes ekskluzive ndaj avionëve “stealth” (të padukshëm nga radari) të brezit të pestë. Zyrtarët e Forcave Ajrore theksuan se sistemet e përparuara të zbulimit, të përpunimit të të dhënave dhe të rrjetëzimit të F-35 i japin Izraelit një avantazh të pakrahasueshëm me asnjë vend tjetër në rajon.
Dokumenti vë në dukje se operacionet me rreze të gjatë të kryera me flotën “Adir” të Izraelit mbështeten në këtë ekskluzivitet, duke mundësuar misione të fshehta larg kufijve izraelitë. Sipas vlerësimit, vendosja e avionëve identikë në Arabinë Saudite mund ta zhvlerësojë këtë avantazh operacional.
Dokumenti paralajmëron gjithashtu se nëse Riadi blen skuadrone F-35 nga Lockheed Martin, marrëveshja mund të zërë linjat kryesore të prodhimit, të vonojë porositë izraelite dhe të prishë planet e modernizimit të Forcave Ajrore. Izraeli ka miratuar tashmë blerjen e një skuadroni të katërt F-35 dhe një skuadroni F-15IA nga Boeing për të zëvendësuar avionët e vjetër.
Presidenti i SHBA-së, Donald Trump, konfirmoi të hënën se Uashingtoni synon të vazhdojë me shitjen, përpara vizitës së planifikuar të Princit të Kurorës Saudite, Mohammed bin Salman, në Shtëpinë e Bardhë, shkruan Ynet.
Javën e kaluar ai tregoi se po shqyrtonte kërkesën e Riadit për të blerë një numër të konsiderueshëm avionësh të avancuar dhe sinjalizoi mbështetje për përpjekjet më të gjera të normalizimit rajonal që përfshijnë Arabinë Saudite dhe Izraelin. Raportet thonë se mbretëria ka kërkuar të blejë 48 avionë F-35.
Një zyrtar i lartë i Shtëpisë së Bardhë tha se Trump ishte i prirur ta mbështeste marrëveshjen, por do të merrte një vendim përfundimtar pas takimit me Princin e Kurorës.
Qëndrimi i Trump dukej se binte në kontrast me një raport nga Associated Press që citonte zyrtarë amerikanë të cilët shprehnin dyshimin se shitja do miratohej gjatë vizitës. Këta zyrtarë thanë se administrata mbetet e shqetësuar se ofrimi i avionëve të avancuar Arabisë Saudite mund të dëmtojë avantazhin cilësor të Izraelit në një kohë kur presidenti kërkon mbështetjen e Izraelit për planin e tij prej 20 pikash për Rripin e Gazës.
